O‘zbekistonda Ikkinchi jahon urushi qatnashchilarining soni ma’lum qilindi

O‘zbekistonda 2026-yil 6-may holatiga ko‘ra, Ikkinchi jahon urushi qatnashchilari va ularga tenglashtirilgan faxriylar soni 60 nafarni tashkil etmoqda. Bu haqda O‘zbekiston Respublikasi Mudofaa vazirligi tomonidan e’lon qilingan infografikada ma’lum qilindi.

Ma’lumotlarga ko‘ra, urush faxriylarining eng katta qismi Toshkent shahrida istiqomat qilmoqda. Poytaxtda hozirda 28 nafar Ikkinchi jahon urushi qatnashchisi yashaydi.

Keyingi o‘rinda Toshkent viloyati bo‘lib, hududda 11 nafar faxriy istiqomat qilmoqda. Farg‘ona viloyatida 5 nafar, Andijon viloyati, Xorazm viloyati va Buxoro viloyatida esa 3 nafardan urush qatnashchisi bor.

Shuningdek, Namangan viloyati va Qashqadaryo viloyatida 2 nafardan faxriy yashamoqda. Surxondaryo viloyati, Samarqand viloyati hamda Jizzax viloyatida esa bittadan Ikkinchi jahon urushi qatnashchisi qolgan.

Ayni paytda Qoraqalpog‘iston Respublikasi, Navoiy viloyati va Sirdaryo viloyati hududlarida Ikkinchi jahon urushi qatnashchilari qolmagani qayd etildi.

Yildan yilga urush faxriylarining soni kamayib borayotgani tabiiy jarayon sifatida baholanmoqda. Shu bois bugungi kunda ular holidan xabar olish, ehtirom ko‘rsatish va munosib qadrlash yanada muhim ahamiyat kasb etmoqda.

9-may — Xotira va qadrlash kuni arafasida faxriylarni yo‘qlash, ularga hurmat bajo keltirish bo‘yicha respublika bo‘ylab turli tadbirlar tashkil etilmoqda. Bu esa urush qatnashchilarining jasorati va fidoyiligini yosh avlodga yetkazishda muhim o‘rin tutadi.

Mutaxassislar ta’kidlashicha, Ikkinchi jahon urushi tarixini asrash va faxriylar xotirasini e’zozlash tinchlikning qadriga yetishda katta ahamiyatga ega. Chunki bugungi osoyishta hayot millionlab insonlarning jasorati evaziga qo‘lga kiritilgan.