“Yosh kitobxon” tanlovi g‘olibi buxorolik Farzona Nosirovani Ichki ishlar vaziri shaxsan muborakbod etdi

Yurtimizda yosh avlodning bilimli, ma’naviyatli va yuksak tafakkur sohiblari bo‘lib voyaga yetishi uchun keng imkoniyatlar yaratilmoqda. Ayniqsa, kitobxonlik madaniyatini rivojlantirish, yoshlarni mutolaaga keng jalb etish borasida amalga oshirilayotgan islohotlar bugun o‘zining amaliy samarasini bermoqda.

Davlatimiz rahbari tashabbusi bilan o‘tkazib kelinayotgan “Yosh kitobxon” respublika tanlovi ana shunday ma’rifiy loyihalardan biri sifatida yoshlar qalbidan chuqur o‘rin egalladi. Tanlovning respublika bosqichida mamlakatning turli hududlaridan tashrif buyurgan iqtidorli yoshlar o‘z bilim va salohiyatlarini namoyon etdi.

Tanlov 10–14, 15–19 hamda 20–30 yosh toifalarida yuqori saviyada tashkil etildi. G‘olib va sovrindorlar Prezident sovg‘alari — zamonaviy elektromobillar hamda pul mukofotlari bilan taqdirlandi. Bu esa yoshlarning kitobxonlik va ilm-fanga bo‘lgan qiziqishini yanada oshirishga xizmat qilmoqda.

Ayniqsa, Buxoro viloyati Peshku tumani Ichki ishlar bo‘limi profilaktika inspektori, mayor Nasim Bog‘iyevning 13 yoshli qizi Farzona Nosirovaning yutug‘i ko‘pchilikni quvontirdi. U “Yosh kitobxon” tanlovining respublika bosqichida mutlaq g‘oliblikni qo‘lga kiritib, Prezident sovg‘asi — BYD Chazor avtomobili bilan taqdirlandi.

Farzona Nosirova ushbu muvaffaqiyatga erishishda ota-onasining mehri, tarbiyasi va doimiy qo‘llab-quvvatlashi muhim o‘rin tutganini alohida ta’kidladi. Bu yutuq, avvalo, oiladagi ma’naviy muhit, kitobga bo‘lgan muhabbat va ilmga qaratilayotgan e’tiborning yorqin ifodasi bo‘ldi.

Shu munosabat bilan O‘zbekiston Respublikasi Ichki ishlar vazirligi rahbari davlatimiz rahbarining topshirig‘iga asosan Farzona Nosirova va uning oila a’zolarini samimiy muborakbod etdi. Uchrashuv davomida ularga kelgusidagi faoliyatida omad va muvaffaqiyatlar tilanib, qimmatbaho sovg‘alar topshirildi.

Ta’kidlanganidek, bugungi kunda kitobxon yoshlarni qo‘llab-quvvatlash, ularning bilim va salohiyatini yuzaga chiqarish davlat siyosatining ustuvor yo‘nalishlaridan biriga aylangan. Ayniqsa, yoshlarning mutolaa madaniyatini oshirish orqali ma’naviy barkamol avlodni voyaga yetkazishga alohida e’tibor qaratilmoqda.

Mutaxassislarning fikricha, “Yosh kitobxon” kabi tanlovlar yoshlarni kitob bilan do‘stlashishga, mustaqil fikrlashga va ilm olishga ruhlantiradi. Bunday loyihalar orqali minglab iste’dodli yoshlar kashf etilmoqda.

Farzona Nosirovaning yutug‘i ham bugungi yoshlar orasida ilm-fan va kitobxonlikka intilish tobora ortib borayotganining yana bir yorqin dalili sifatida e’tirof etilmoqda.

Darhaqiqat, kitob o‘qigan yosh — jamiyatning ertangi taraqqiyotini belgilovchi kuchdir. Shu bois yurtimizda kitobxonlikni rivojlantirishga qaratilgan tashabbuslar bundan buyon ham izchil davom ettirilishi ta’kidlanmoqda.