1-iyundan O‘zbekistonda nimalar o‘zgaradi?

2026-yil 1-iyundan boshlab O‘zbekistonda iqtisodiyot, energetika, ekologiya, qurilish, arxiv, turizm va farmatsevtika kabi qator yo‘nalishlarda yangi tartib va o‘zgarishlar kuchga kiradi. Quyida eng muhim yangiliklar bilan tanishing.

Nasldor chorva QQSdan ozod qilinadi

Prezidentning PQ–179-son qaroriga muvofiq, 2026-yil 1-iyundan 2029-yil 1-avgustgacha xorijdan olib kiriladigan nasldor qoramol, qo‘y va echkilar qo‘shilgan qiymat solig‘idan ozod etiladi.

Shuningdek, 2026–2028-yillarda qoramollar sonini 16,5 million boshga, qo‘y va echkilarni 30 million boshga, parrandalarni esa 141 million boshga yetkazish rejalashtirilgan.

Elektr va gaz tariflari o‘zgaradi

1-iyundan boshlab aholi va tadbirkorlar uchun elektr energiyasi hamda tabiiy gaz tariflari yangilanadi. Hukumat ma’lumotiga ko‘ra, tariflar o‘rtacha 9,9 foizga indeksatsiya qilinadi.

Mutasaddilar tariflar oshirilmaganini, balki inflyatsiya va xarajatlar asosida qayta hisoblanganini ta’kidlamoqda.

Qurilishlarda ekologik nazorat kuchayadi

Prezident farmoniga muvofiq, “Toza havo” loyihasi doirasida endilikda qurilish maydonlari fon monitoringi stansiyalari bilan jihozlanadi.

Bundan tashqari, qurilish hududlarida onlayn kameralar o‘rnatilib, ular Ekologiya qo‘mitasining yagona ma’lumotlar bazasiga ulanadi.

Mahkum yoshlar raqamli kasblarga o‘qitiladi

2026-yil 1-iyundan Toshkent, Navoiy вилояти va Qashqadaryo вилоятиda jazoni ijro etish muassasalaridagi yoshlarni zamonaviy IT va raqamli kasblarga o‘qitish tizimi joriy qilinadi.

Loyiha 18–30 yoshdagi mahkumlarni qamrab oladi va keyinchalik boshqa hududlarga ham bosqichma-bosqich kengaytiriladi.

Farmatsevtika korxonalariga yangi imtiyozlar beriladi

1-iyundan farmatsevtika korxonalari uchun xalqaro GMP sertifikatlarini olish xarajatlarining bir qismi qoplab beriladi.

Shuningdek, ilmiy muassasalar yaratgan yangi dori vositalarini ishlab chiqarish bilan bog‘liq ayrim xarajatlar ham davlat tomonidan subsidiya qilinadi.

Suv va ichimliklar markirovkasi tan olinadi

Endilikda O‘zbekiston hamkor davlatlarning suv va salqin ichimliklar uchun raqamli markirovka kodlarini tan oladi.

Ma’lumotlar “Asl belgisi” tizimida saqlanadi va Soliq qo‘mitasi tomonidan nazorat qilinadi.

Yagona milliy arxiv tizimi ishga tushadi

1-iyundan arxiv xizmatlari uchun Yagona milliy arxiv axborot tizimi joriy qilinadi.

Bundan tashqari, noyob hujjatlar bilan ishlashda RFID texnologiyasi majburiy tartibda qo‘llanadi.

Bojxona to‘lovlari bo‘lib-bo‘lib to‘lanadi

Tadbirkorlarga bojxona bojlarini 120 kungacha kechiktirib yoki bo‘lib-bo‘lib to‘lash imkoniyati yaratiladi.

Bu esa import bilan shug‘ullanuvchi biznes vakillariga moliyaviy yengillik beradi.

Ugom daryosi hududida qurilishlar taqiqlanadi

Prezident qaroriga ko‘ra, 1-iyundan Ugom daryosi sohilbo‘yi hududlarida ekologik muvozanatga zarar yetkazuvchi qurilish va gidrotexnik ishlarga qat’iy taqiq qo‘yiladi.

Ziyoratgohlar uchun dizayn-kod joriy qilinadi

Turistlar ko‘p tashrif buyuradigan ziyoratgoh hududlari uchun alohida dizayn-kod ishlab chiqiladi.

Mazkur tartib tarixiy va diniy maskanlar atrofidagi qurilish va infratuzilma ishlari yagona me’moriy talablarga asoslangan holda olib borilishini ta’minlaydi.

Davlat xizmatchilari diagnostikadan o‘tkaziladi

Korrupsiyaviy xavfi yuqori bo‘lgan ayrim lavozimlardagi davlat xizmatchilari va nomzodlar maxsus diagnostikadan o‘tkaziladi.

Mazkur tizim korrupsiyaning oldini olish va davlat boshqaruvida shaffoflikni oshirishga qaratilgan.

Qurilish chiqindilariga yangi talablar joriy etiladi

Endilikda qurilish loyihalarida chiqindilar hajmi va ularni utilizatsiya qilish tartibi oldindan belgilanishi shart bo‘ladi.

Shuningdek, chang va yoqimsiz hidlarning oldini olish bo‘yicha choralar ko‘rish majburiy hisoblanadi.

Yangi tartib va o‘zgarishlar iqtisodiyotning turli sohalarini modernizatsiya qilish, ekologik xavfsizlikni ta’minlash, biznes uchun qulaylik yaratish hamda davlat boshqaruvida raqamlashtirishni jadallashtirishga xizmat qilishi kutilmoqda.