Buxoro tumani hokimligida gender tenglik mavzusi

Ishbilarmon, xayr-saxovat va mehr-muruvvat elchisi, ta’lim va ma’rifat homiysi, rassom, badiiy dizayner, bosh murabbiy… Asli Samarqand shahrida tug‘ilib voyaga yetgan, yurtimizda Tibbiyot kollejida tahsil olib, hamshira sifatida 2004-yildan Respublika Shoshilinch tibbiy yordam ilmiy markazining Samarqand viloyati bo‘limida mehnat qilgan, uning 2006-yildan e’tiboran butun taqdirini o‘zgartirib yuborgan Angliya safari va keyinchalik Buyuk Britaniyaning London shahridagi “Highgate region” ingliz tili maktabida tahsil olish bilan birga Buyuk Britaniyaning konservativ partiyasi a’zosi, Lordlar Palatasining umrbod a’zosi Muhammad Shayx bilan taqdir bog‘langan Guli Xonim Shayxga berilgan ta’riflar bu.

Joriy yilning 2-aprel kuni Buxoro tuman hokimligi majlislar zalida Guli Xonim Shayx tumandagi tadbirkor ayollar hamda o‘qituvchilar bilan uchrashib gender tenglik mavzusida ma’ruza kildi.

Guli Xonim Shayx o‘z so‘zida “So‘nggi yillarda Prezidentimiz tomonlaridan xotin-qizlar masalalariga, ularning turmush sharoitlarini yaxshilash, maishiy hayotdagi muammolarini hal qilish, iqtidori va imkoniyatlarini ko‘rsatish uchun qulay sharoit yaratilayotganligi, oilada, jamiyatda, ayniqsa, xotin-qizlarning ijtimoiy hayotdagi faolligini oshirishga alohida e’tibor qaratilayotgani natijasida ijtimoiy munosabatlarda ham, qonunchilikda ham katta o‘zgarishlar amalga oshirilmoqda” deb alohida ta’kidladi.