Buxoro shahrida ko‘p kvartirali uylar yonidagi noqonuniy qurilmalar demontaj qilindi

Buxoro shahrining To‘qimachi mahallasida shaharsozlik qonunchiligi talablariga zid ravishda barpo etilgan noqonuniy qurilmalar aniqlandi. Bu haqda Buxoro viloyati Qurilish va uy-joy kommunal xo‘jaligi sohasida hududiy nazorat qilish inspeksiyasi Buxoroisharif.uz internet nashriga ma’lum qildi.

Hududiy inspeksiya xodimlari mulkdorlarga noqonuniy qurilmalarni belgilangan tartibda bartaraf etish bo‘yicha majburiy ko‘rsatmalar bergan. Belgilangan muddatda tegishli choralar ko‘rilmagach, inspeksiya mas’ullari hamkor tashkilotlar ko‘magida qurilmalarni demontaj qildi.

Nazorat ishlari Alpomish ko‘chasidagi 5/1-uyda ham davom etdi. Mazkur ko‘p kvartirali uyning 9–10-xonadonlari yonida aniqlangan noqonuniy qurilmalar olib tashlandi.

Xuddi shu manzildagi 17–25-xonadonlar atrofida ham o‘zboshimchalik bilan qurilgan obyektlar aniqlanib, ular belgilangan tartibda bartaraf etildi.

Inspeksiya fuqarolardan ko‘p kvartirali uylarning umumiy foydalanish joylari va ularga tutash hududlarda o‘zboshimchalik bilan qurilish ishlarini olib bormaslikni, shaharsozlik me’yorlari va qoidalariga qat’iy rioya etishni so‘radi. Nazorat reydlari viloyat hududlarida davom ettirilmoqda.