G‘ijduvonda suv hisoblagichiga noqonuniy aralashuv aniqlandi

G‘ijduvon tumanidagi O‘zanon mahallasida ichimlik suvi ta’minoti holati 2026-yil 14-yanvardagi 1-sonli qo‘shma qaror asosida o‘rganildi. Tekshiruv davomida suv hisoblagichidan foydalanish talablariga rioya etilishi ham nazorat qilindi. Bu haqda Buxoro viloyati Qurilish va uy-joy kommunal xo‘jaligi sohasida hududiy nazorat inspeksiyasi Buxoroisharif.uz internet nashriga ma’lum qildi.

O‘zanon mahallasida 1 124 ta xonadon va 4 463 nafar aholi istiqomat qiladi. Hududda 350 o‘rinli umumta’lim maktabi hamda 200 o‘rinli maktabgacha ta’lim tashkiloti mavjud. Mahalla markazlashgan ichimlik suvi bilan to‘liq ta’minlangan.

O‘rganish jarayonida fuqarolardan biri suv hisoblagichiga noqonuniy aralashib, ichimlik suvidan belgilangan tartibni buzgan holda foydalangani aniqlandi. Holat inspeksiya mutaxassislari tomonidan hujjatlashtirildi.

Vazirlar Mahkamasining 2014-yil 15-iyuldagi 194-son qarori bilan tasdiqlangan qoidalarning 49-bandiga ko‘ra, iste’molchilarga suv ta’minoti va oqova suv chiqarish tarmoqlariga o‘zboshimchalik bilan ulanish hamda ulardan foydalanish taqiqlanadi.

Aniqlangan qoidabuzarlik yuzasidan fuqaroga Ma’muriy javobgarlik to‘g‘risidagi kodeksning 163-moddasi asosida ma’muriy jarima qo‘llandi. Inspeksiya iste’molchilarga ichimlik suvi tarmoqlari va hisoblagichlardan faqat belgilangan tartibda foydalanish zarurligini eslatdi.