Shofirkonda qariyb 100 nafar ayol saratonni erta aniqlash bo‘yicha tibbiy ko‘rikdan o‘tdi

2026-yil 25-sentyabr kuni Shofirkon tumani Markaziy poliklinikasida bachadon bo‘yni va ko‘krak bezi saratonini erta aniqlash hamda oldini olishga qaratilgan tibbiy ko‘rik tashkil etildi. Bu haqda Buxoro viloyati sog‘liqni saqlash boshqarmasi Buxoroisharif.uz internet nashriga ma’lum qildi.

Poliklinika rahbari Abror Hamroyev tashabbusi bilan o‘tkazilgan tadbirda qariyb 100 nafar xotin-qiz malakali mutaxassislar tomonidan tibbiy ko‘rikdan o‘tkazildi.

Tibbiy ko‘riklarga ko‘p tarmoqli markaziy poliklinika akusher-ginekologlari Shahlo Ramazonova va Dilorom Mahmudova boshchilik qildi.

Ko‘rik davomida ayollarga onkologik kasalliklarni erta aniqlash, muntazam tibbiy tekshiruvlardan o‘tish va profilaktika choralariga rioya qilish bo‘yicha tavsiyalar berildi.

Bunday profilaktik tadbirlar kasalliklarni erta bosqichda aniqlash va bemorlarga o‘z vaqtida tibbiy yordam ko‘rsatishga qaratilgan.