Sardor Rahimxon qizi betob ekanligini maʼlum qildi

“Yurak amri” loyihasi asoschisi Sardor Rahimxon Instagram sahifasida qizi betobligini maʼlum qildi.

U kuzatuvchilaridan qizining tuzalib ketishi uchun shifo soʻrab, duo qilishini soʻragan. Xonanda obunachilari orasida duosi ijobat boʻladigan insonlar koʻpligini taʼkidlagan. Shuningdek, Sardor Rahimon qiziga dard bergan Alloh uning shifosini berishini ham soʻragan.

“Azizlar, orangizda duosi ijobat insonlar koʻp. Bugun sizlardan qizimning dardiga shifo soʻrab, duo soʻrayman. Alloh mehribon, dardini bergan, shifosini ham bersin”, — deb yozadi u.

Avvalroq Sardor Rahimxon “Yurak amri” loyihasi faoliyatini toʻxtatganini aytgandi. Sardor Rahimxon katta xatolarning oldini olish, oʻzini isloh qilish uchun “Yurak amri”ni vaqtinchalik toʻxtatdi. U 2,5 yil mobaynida loyiha uchun yordam bergan barchaga minnatdorchilik bildirdi. Shuningdek, Sardor Rahimxon “Yurak amri” butunlay yopilmasligini ham taʼkidladi.

“Aziz yurtdoshlar, bugun sizlarga ”Yurak amri« nomidan rasmiy eʼlon bilan murojaat qilmoqchiman. Biz katta xatolarning oldini olish, oʻzimizni isloh qilish, oldindagi katta rejalarga kuch va bilim toʻplash, xalqimiz va yurtboshimiz oldilarida yuzimiz doim yorugʻ boʻlishi uchun vaqtinchalik faoliyatimizni yakunlashga qaror qildik. Oʻylaymanki, siz bizni bu qarorimizda ham qoʻllab-quvvatlab duo qilishda davom etasiz.

2 yarim yillik faoliyat davomida yonimizda turgan, yordamini ayamagan, miskin va yetimlar uchun borini ayamagan, ehson, mehnat qilganlar va albatta muhtaram Prezidentimizdan cheksiz minnatdormiz. Sizlarning yordamingiz va duolaringiz boʻlmaganda biz boʻlmasdik, birgalikda hali Insha Alloh vatanimiz uchun qiladigan xizmatlarimiz juda koʻp azizlar. Bu oʻtgan arzimagan 2 yarim yillik hayotimiz biz uchun asrlarga teng. Alhamdulillah oʻzbek xalqi uchun nimadir qila olishga imkon berdi Alloh. Ammo biling bu vidolashish emas, biz sizlardan ozgina tanaffus soʻramoqdamiz.

Hurmat va cheksiz mehr-muhabbat ila «Yurak amri» va Sardor Rahimxon. Alloh hammamizdan rozi boʻlsin, yurtimizni panohida asrasin”, — deb yozadi u.

Manba: shoubiz.uz