Islomda 3 kundan ortiq arazlashish joiz emas

Islom dini insonlarni o‘zaro hamjihatlik, bag‘rikenglik, o‘zaro hurmat va oilaviy totuvlikka chorlaydi. Oilalar, insonlar o‘zaro hamjihat, totuv bo‘lsalar jamiyat ham tinch bo‘ladi, tinchlik bo‘lgan joyda esa taraqqiyot bo‘ladi.

Inson hayoti davomida ba’zan boshqa insonlardan xafa bo‘ladi, ular bilan arazlashib qoladi. Bu narsa har bir insonning hayotida bo‘ladi. Shunday paytlarda inson boshqa insonlarni kechirishi, arazlashganligini unutib, yaxshi muomalasini davom ettirishi lozim.

Islom dini insonlarni bir-biri bilan uch kundan ortiq arazlashishni halol hisoblamaydi.

Abu Hurayra roziyallohu anhudan rivoyat qilinadi: «Rasululloh sollallohu alayhi vasallam: “Mo‘min mo‘mindan 3 kundan ortiq arazlashi halol emas. Agar u 3 kunni o‘tkazgan bo‘lsa, o‘sha bilan uchrashib, salom bersin. Agar uning salomiga alik qaytarsa, ikkilari ajrga sherik bo‘ladilar. Agar salomga alik qaytarmasa, u gunohni o‘ziga olgan bo‘ladi. Musulmon esa arazlashdan chiqadi”, – dedilar» (Abu Dovud rivoyati).

Afsus bilan aytishimiz mumkinki, bugungi kunda ayrim er-xotinlar, aka-uka, opa-singil, qalin do‘stlar va hatto ota-bolalarning bir-birlarini tushunmasdan arazlashib yurishganini guvohi bo‘lmoqdamiz. Bu mas’uliyatni his qilmay, huda-behudaga nizolashish natijasidir. Arazlashganlardan so‘rasangiz hamma o‘zining haq ekanligini isbotlashga urinadi. Bu ayni xatodir. Aslida, arazlashishdan chekinish, bir-birovni kechirish fazilatdir.

Alloh taolo hamjihat bo‘lib yashash baxtiga barchamizni muvaffaq qilsin!

Muallif: Mirjon Egamberdiyev, “Xoja Orif Mohitobon Revgariy” jome’ masjidi imom-xatibi.
Manba: O‘zbekiston musulmonlari idorasi Buxoro viloyati vakilligi.