Buxoroda avtobuslar harakati keskin kelgan sovuq ob-havo tufayli toʻxtatiladimi?

Barchaga ma’lumki, sovuq ob-havo sharoitida siqilgan gaz quyish shahobchalari faoliyatida cheklovlar joriy etilayotgani munosabati bilan ijtimoiy tarmoqlarda Buxoro jamoat transportlari harakati to‘xtalishi mumkinligi to‘g‘risida xabarlar tarqalmoqda.

Buxoro viloyati transport boshqarmasi ushbu fikrlarga munosabat bildirdi. Jumladan, tashkilot tomonidan jamoat transportlarining uzluksiz harakatini ta’minlash uchun gaz to‘ldirish shahobchalarida yuzaga kelishi mumkin bo‘lgan muammolarni oldini olish bo‘yicha barcha zaruriy choralar ko‘rilganligini eʼlon qildi.

Shuningdek, mazkur masala kuni kecha Buxoro viloyati hokimi boshchiligida o‘tkazilgan yig‘ilishda ham muhokama qilinib, mas’ul tashkilotlarga tegishli ko‘rsatmalar berildi. Yo‘lovchi tashuvchi korxonalar tomonidan gaz to‘ldirish uchun ushbu faoliyatni amalga oshiruvchi korxonalar bilan tuzilgan shartnomaga asosan, avtobuslarning siqilgan gaz yoqilg‘isi bilan ta’minlanishi hamda transportlarning to‘liq harakatlanishi uchun boshqarma xodimlarining erta tongdan nazorat olib borishi yo‘lga qo‘yilgan boʻlib, jamoat transporti harakati bir maromda davom ettiriladi.