G‘ijduvonda “nasos” bilan gaz tortgan novvoyxona va oshxona egalari jazolandi

Kuni kecha G‘ijduvon tumanida IIB va boshqa tegishli tashkilotlar bilan hamkorlikda o‘tkazilgan tezkor profilaktik tadbirlar davomida bir nechta tabiiy gaz quvurlariga noqonuniy ulanish, qo‘shimcha gaz so‘ruvchi elektr dvigatellarini o‘rnatish kabi qonunbuzarlik holatlari fosh etildi. Bu haqda Buxoro viloyati IIB matbuot xizmati xabar qilmoqda.

Jumladan, olingan tezkor ma’lumotlar asosida tumanning “Zarangari” hamda “Bo‘lakiyon” mahallalarida yashovchi fuqarolarning yashash xonadonlari ko‘zdan kechirilib, 2 ta holatda tabiiy gaz quvuriga noqonuniy tarzda gaz so‘ruvchi elektr dvigatelini o‘rnatib foydalanib kelayotgan fuqarolarning huquqbuzarliklari aniqlangan. Xususan, novvoyxona va umumiy ovqatlanish oshxonasida noqonuniy o‘rnatilgan gaz tortish uskunlari xolislar ishtirokida hujjatlashtirib olindi.

Mazkur holatlar bo‘yicha tuman IIB hamda “G‘ijduvongaz” filiali xodimlari tomonidan dalolatnoma rasmiylashtirilib, noqonuniy gaz so‘rg‘ichdan foydalangan fuqarolarga qonunda belgilangan tartibda choralar ko‘rildi.