Payg‘ambarimiz Muhammad sollallohu alayhi vasallam necha yoshlarida olamdan o‘tganlar?

Savol: Bilamizki Payg‘ambarimiz Muhammad sollallohu alayhi vasallamning tug‘ilgan yillari ishonchli manbalarda 571 yil deb ma’lum qilingan. Vafotlari esa 632 yil deb ko‘rsatilgan. Shunday ekan nima uchun ul zotning 63 yoshda bu dunyoni tark etganlari aytiladi? Hisoblab chiqilganda 63 emas, 61 yosh chiqyaptiku. Xoʻsh, Payg‘ambarimiz Muhammad sollallohu alayhi vasallam necha yoshlarida olamdan o‘tganlar?

Javob: Bismillahir Rohmanir Rohim. Olamlarga rahmat bo‘lib kelgan zot – Hazrati Payg‘ambarimiz hijratning o‘n birinchi yili, rabbi’ul avval oyining o‘n uchinchisi, ya’ni dushanba kunda (melodiy 632 yili, 6-oyning 8-kuniga to‘g‘ri keladi) oxiratga rihlat qilganlar. Payg‘ambarimiz alayhissalomning yoshlari qamariya yil hisobi bo‘yicha 63 yoshu 3 kun, shamsiya yil hisobi bo‘yicha 61 yoshu 84 kun edi. Ko‘pchilik diniy manbalarimizda asosan qamariy hisob-kitob bo‘yicha so‘z yuritilgani bois Rasuli akram sollallohu alayhi vasallamning 63 yil umr ko‘rganlari zikr qilingan. Vallohu a’lam.

Manba: O‘zbekiston musulmonlari idorasi Fatvo hay’ati.