Asli buxorolik boʻlgan Amrillo Inoyatov vazir boʻldi

Davlatimiz rahbarining tegishli farmoni bilan Amrillo Shodiyevich Inoyatov O‘zbekiston Respublikasi Sog‘liqni saqlash vaziri lavozimiga tayinlandi.

A. Inoyatov 1979-yilda tug‘ilgan. 2001-yil Buxoro davlat tibbiyot institutini, 2005-yilda Toshkent tibbiyot akademiyasida “Bolalar yuz-jag‘ jarrohligi” mutaxassisligi bo‘yicha aspiranturani tamomlagan.

Mehnat faoliyatini 2001-yilda Buxoro davlat tibbiyot instituti ilmiy-tekshirish laboratoriyasida boshlagan. 2006–2014-yillarda ushbu institutning “Xirurgik stomatologiya” kafedrasi assistenti, mazkur kafedra mudiri, Stomatologiya fakulteti dekani vazifalarida ishlagan.

2014–2020-yillarda Toshkent davlat stomatologiya instituti Buxoro filialining Stomatologiya fakulteti dekani, ushbu filial direktori, Buxoro davlat tibbiyot instituti rektori sifatida faoliyat ko‘rsatgan.

Shundan so‘ng O‘zbekiston Respublikasi Prezidentining yoshlar, fan, ta’lim, sog‘liqni saqlash, madaniyat va sport masalalari bo‘yicha maslahatchisi o‘rinbosari lavozimiga tayinlangan.

Tibbiyot fanlari doktori, professor Amrillo Inoyatov 2020-yil 3-noyabrdan buyon Sog‘liqni saqlash vazirining birinchi o‘rinbosari vazifasida ishlab kelayotgan edi.