Bugun ertalab G‘ijduvondagi savdo majmuasida yong‘in sodir bo‘ldi

Bugun, 7-yanvar kuni soat 05:20 da G‘ijduvon tumanidagi “Degrezon” mahallasi, Degrezon ko‘chasida joylashgan savdo majmuasida yong‘in sodir bo‘lgan.

Yong‘inni bartaraf etish uchun 8 ta yong‘in-qutqaruv ekipaji jalb qilingan. Soat 05:23 da voqea joyiga yetib borib, hudud soat 05:45 gacha qurshab olingan va yong‘in soat 07:50 da to‘liq bartaraf etilgan.

Buxoro viloyati FVB axborot xizmati rahbari Mirjon Fayzulloyevning bildirishicha, yong‘in bartaraf etilgach, uning oqibatida zarar yetgan hudud 400 metr² maydondan iborat.

“– Kuchli yong‘in oqibatlarini bartaraf etish jarayonida dastlab 250 metr² maydon yongan, deya taxmin qilingan edi. Biroq, changli va burqsigan tutun, ustiga-ustak olovning balandligi yong‘in zabt etayotgan maydon hududini aniqlashda halal bergan”, – dedi FVB axborot xizmati rahbari M. Fayzulloyev.

Mutaxassislar tomonidan olib borilgan atroflicha o‘rganishlar davomida 2 qavatli savdo majmuasining “B” blokidagi savdo do‘konlarining 960 m² maydonda joylashgan 61 ta do‘kon va ichidagi jihozlar (oziq-ovqat, kiyim-kechak va parfumeriya buyumlari) yongan.

Qutqaruvchilarning say-harakatlari natijasida savdo majmuasining “B” bloki yerto‘la qismidagi 64 ta savdo do‘koni hamda majmuaning 6 000 m² maydondagi A, B bloklaridagi yerto‘la qismi va 1-qavatdagi jami 256 ta savdo do‘konlari yong‘indan saqlab qolingan.

Hodisa oqibatida tan jarohati olgan va halok bo‘lganlar yo‘q.

Ayni damda FVB ekspertiza vakillari yong‘inning kelib chiqish sabbalari o‘rganilmoqda.