Ra’no Shodiyeva Hindistondagi kinofestivalda taqdirlandi

O‘zbekistonda xizmat ko‘rsatgan artist Ra’no Shodiyeva kuni kecha Hindistonning Mumbay shahrida bo‘lib o‘tgan Shanxay hamkorlik tashkilotiga a’zo davlatlarning badiiy va televizion filmlari festivalining “Eng yaxshi ayol obrazi” nominatsiyasi bo‘yicha g‘oliblikni qo‘lga kiritdi. Bu haqda Kinematografiya agentligi axborot xizmati xabar bermoqda.

Aktrisa ushbu mukofotga real voqealarga asoslangan “Ayol qismati” filmi (rejissor Dilmurod Masaidov) dagi roli uchun loyiq deb topilgan.

Aytish kerakki, ushbu filmda Prezident Shavkat Mirziyoyev topshirig‘iga asosan o‘tkazilgan “Mehr” insonparvarlik operatsiyasi doirasida Suriyadan qaytarilgan o‘zbek ayollarining ayanchli taqdiri haqida hikoya qiladi.

Mazkur festivalda xitoylik rejissor Chjao Syaozji tomonidan suratga olingan “Uyga uzoq yo‘l” filmi “Eng yaxshi rejissor”, qozog‘istonlik “Paralimpiyachi” filmining aktyori Asqar Ilyosov esa “Eng yaxshi erkak roli” uchun ham mukofotga sazovor bo‘lishdi.

Shuningdek, Tojikistonning “Fortuna” va Qirg‘izistonning “Jannatga yo‘l” filmlari esa hakamlar hay’atining alohida e’tirofiga sazovor bo‘lgan.