Prezident Buxoro viloyat “GAI” boshlig‘i va Buxoro tuman IIB xodimini taqdirladi

Ichki ishlar organlari xodimlari kuni munosabati bilan O‘zbekiston Respublikasi Prezidentining bir guruh soha vakillarini davlat mukofotlari bilan taqdirlash to‘g‘risidagi farmoni qabul qilindi. Mukofotlanganlar orasida Buxoro viloyatida faoliyat yuritayotgan ikki nafar ichki ishlar organi xodimi ham bor.

Prezident farmoniga muvofiq, Buxoro tumani ichki ishlar bo‘limining xotin-qizlar masalalari bo‘yicha katta inspektori Luiza Ramazonovna Muxsinova “Sog‘lom turmush” medali bilan taqdirlandi.

Shuningdek, Buxoro viloyati Ichki ishlar boshqarmasi Yo‘l harakati xavfsizligi boshqarmasi boshlig‘i Anvar Raxmatovich Axmedov “Shuhrat” medali bilan mukofotlandi.

Mazkur mukofotlar ichki ishlar organlarida xizmat qilayotgan xodimlarning fidokorona mehnati, jamoat xavfsizligini ta’minlash, huquqbuzarliklarning oldini olish hamda fuqarolarning huquq va qonuniy manfaatlarini himoya qilish yo‘lidagi xizmatlariga berilgan yuksak e’tirofdir.

Buxoroisharif.uz tahririyati davlat mukofotlariga sazovor bo‘lgan har ikki yurtdoshimizni samimiy tabriklab, ularga kelgusi faoliyatida muvaffaqiyatlar, mustahkam sog‘lik va yangi yutuqlar tilaydi.