Microsoft asoschisi Bill Geyts sun’iy intellekt haqida fikr bildirdi

Microsoft kompaniyasi asoschisi Bill Geyts Forbes jurnaliga bergan intervyusida ChatGPT va sun’iy intellekt (AI) sohasidagi so‘nggi yildagi barcha yutuqlardan “hayratda” ekanligini aytdi.

Shuningdek, tadbirkor sun’iy intellekt kelajagi haqida o‘z fikrlari bilan o‘rtoqlashdi.

“– Sun’iy intellekt biz bilgan mehnat bozorini o‘zgartiradi… Avtonom avtomobillar – juda murakkab texnologiya, ammo, zavod va fabrikalarni robotlashtirish yaqin 5-10 yil ichida amalga oshiriladi”, – dedi Bill Geyts.

Biroq, Microsoft asoschisi sun’iy intellekt “kambag‘al hududlardagi talabalar uchun matematika o‘qituvchisi” bo‘lishi yoki “olisda joylashganligi sababli, shifokorga murojaat qila olmaydigan Afrikadagi odamlarga tibbiy maslahatlar berishi” mumkinligiga ishonmasligini aytdi.

Shu bilan birga, Geyts mashhur neyron tarmoqlari, xususan ChatGPT boti haqida qanday fikrda ekani haqidagi savolga shunday javob berdi:

“– Men bu vositalar bilan o‘ynashni yaxshi ko‘raman – bu juda qiziq. G‘alati tuyulishi mumkin, lekin men ham ba’zan o‘yin-kulgi uchun ChatGPT dan foydalanaman. Garchi jiddiy vazifalar uchun unga kirish huquqi berilgan bo‘lsa ham, ba’zan undan, masalan, Shekspir yozishi mumkin bo‘lgan she’r yozib berishni so‘rayman”, – dedi Bill Geyts.

Bundan avval Microsoft kompaniyasi o‘zining qidiruv tizimi – Bing ning sun’iy intellektga asoslangan versiyasini taqdim etgani haqida xabar bergan edi.