Milliy armiya – tinchlik kafolati: Buxoroda 14-yanvar keng nishonlandi

Buxoro viloyatida 14-yanvar – Vatan himoyachilari kuni hamda O‘zbekiston Respublikasi Qurolli Kuchlari tashkil etilganining 34 yilligi munosabati bilan qator bayram tadbirlari bo‘lib o‘tdi. Bu haqda viloyat hokimligi axborot xizmati xabar qilmoqda.

Tadbirlar Buxoro shahridagi Matonat madhiyasi majmuasida boshlandi. Bu yerda Motamsaro ona haykali poyiga gul qo‘yish marosimi tashkil etildi. Unda viloyat rahbariyati, harbiy tuzilmalar, huquq-tartibot organlari, jamoatchilik va yoshlar vakillari ishtirok etdi. Marosim tinchlik va yurt ozodligi yo‘lida jon fido qilgan vatandoshlar xotirasiga hurmat bajo keltirishga bag‘ishlandi.

Shundan so‘ng bayram tadbirlari Buxoro viloyat musiqali drama teatrida davom etdi. Tantanali yig‘ilishda harbiy xizmatchilar, faxriylar, ularning oila a’zolari, davlat va jamoat tashkilotlari vakillari qatnashdi.

Dastur doirasida buxorolik xalq qahramoni Mahmud Torobiy jasoratiga bag‘ishlangan sahna ko‘rinishi namoyish etildi. Tomosha yoshlar orasida tarixiy xotirani mustahkamlash va vatanparvarlik tuyg‘ularini kuchaytirishga xizmat qildi.

Rasmiy qismda so‘zga chiqqan viloyat hokimi Botir Zaripov so‘nggi yillarda mamlakatda armiyani modernizatsiya qilish, harbiy xizmatchilarni ijtimoiy qo‘llab-quvvatlash, yoshlarni vatanparvarlik ruhida tarbiyalash borasida amalga oshirilayotgan ishlarni qayd etdi. Xususan, viloyatda “Jasorat maktablari” faoliyati yo‘lga qo‘yilgani, maktablarda chaqiruvga qadar tayyorgarlik sinflari yangilangani ta’kidlandi.

Bayram tadbirida harbiylarning ko‘rgazmali chiqishlari, orkestr va san’atkorlar ishtirokidagi konsert dasturi namoyish etildi. Tadbir yakunida bir guruh harbiy xizmatchilar viloyat hokimligining tashakkurnomalari va esdalik sovg‘alari bilan taqdirlandi.

Bayramona ruhda o‘tgan tadbirlar Buxoroda Vatan himoyachilariga bo‘lgan e’tibor va ehtiromning yana bir ifodasi bo‘ldi.