81 yoshli buvi Minecraft orqali nabirasining hayoti uchun kurashmoqda: YouTube’da kutilmagan muvaffaqiyat

AQShning Kaliforniya shtatida yashovchi 81 yoshli Syu Jeko oilasini qo‘llab-quvvatlash uchun zamonaviy texnologiyalardan noodatiy tarzda foydalanishga qaror qildi. U nabiralaridan mashhur Minecraft o‘yinini o‘rganib, YouTube platformasida GrammaCrackers nomli kanal ochdi va qisqa vaqt ichida minglab internet foydalanuvchilarining e’tiborini tortdi.

“Pravila jizni” nashri xabariga ko‘ra, kanal ishga tushganiga atigi bir oy bo‘lishiga qaramay, obunachilar soni 100 mingdan oshgan. Eng e’tiborlisi, Syu ilgari na geymer, na videobloger bo‘lgan — u texnologiyalardan faqat kundalik ehtiyojlar uchun foydalangan, xolos.

Bu qarorga esa oilaviy sinov sabab bo‘lgan. Syuning 17 yoshli nabirasi Jek og‘ir xastalik bilan kurashmoqda. Aynan shu holat buvini yangi yo‘l izlashga undagan. Dastlab o‘yin o‘ynash va jonli efirlar olib borish unga qiyin kechgan bo‘lsa-da, vaqt o‘tib u bu faoliyatni daromad manbaiga aylantira oldi.

YouTube kanaldan tushayotgan mablag‘lar — monetizatsiya, reklama daromadlari va tomoshabinlarning ko‘ngilli xayriyalari — to‘liq Jekning davolanishi va reabilitatsiyasiga yo‘naltirilmoqda. Ma’lum qilinishicha, u saratonga qarshi og‘ir davolash bosqichini ortda qoldirgan va hozirda uzoq davom etadigan sog‘ayish jarayonidan o‘tmoqda.

Qayd etilishicha, Syuning Minecraft’ga qiziqishi ham bevosita Jek bilan bog‘liq: o‘tgan yozda nabirasi buvisiga o‘yin asoslarini o‘rgatgan. Bundan tashqari, oila GoFundMe platformasida ham xayriya aksiyasini yo‘lga qo‘ygan. Syuning strimlarini tomosha qilayotgan foydalanuvchilar ushbu tashabbusni faol qo‘llab-quvvatlamoqda.

Ushbu voqea nafaqat internetda, balki jamoatchilik orasida ham katta qiziqish uyg‘otib, zamonaviy texnologiyalar yoshdan qat’i nazar insonlarni birlashtirishi va og‘ir vaziyatlarda real yordam manbaiga aylanishi mumkinligini yana bir bor ko‘rsatdi.