Buxoro viloyati IIB: “To‘qimachi” dehqon bozorida reyd tadbirlari o‘tkazildi

Buxoro shahridagi dehqon bozorlarida veterinariya-sanitariya nazorati yuzasidan reydlar o‘tkazilmoqda

Buxoro viloyati IIB JXX JTSB Karantin tadbirlarini ta’minlash guruhi xodimlari viloyat Veterinariya va chorvachilikni rivojlantirish boshqarmasi mutaxassislari bilan hamkorlikda Buxoro shahridagi Markaziy dehqon bozori hamda “To‘qimachi” dehqon bozorida navbatdagi nazorat-reyd tadbirlarini o‘tkazdi.

Reydlar davomida bozorlarda savdoga chiqarilgan oziq-ovqat mahsulotlarining yaroqlilik muddati, saqlash sharoitlari, veterinariya-sanitariya hujjatlari va umumiy gigiyena talablariga rioya etilishi atroflicha o‘rganildi. Xususan, go‘sht, sut va sut mahsulotlari, parranda go‘shti, baliq hamda tez buziluvchi mahsulotlarning sovitish zanjiri va saqlash harorati tekshirildi.

Shuningdek, sotuvchi va tadbirkorlar bilan tushuntirish ishlari olib borilib, aholini sifatli, sog‘liq uchun xavfsiz oziq-ovqat mahsulotlari bilan ta’minlash, sanitariya qoidalariga qat’iy amal qilish, mahsulotlarni belgilangan joylarda va tegishli sharoitda saqlash bo‘yicha tavsiyalar berildi.

Nazorat tadbirlari davomida aniqlangan kamchiliklar yuzasidan mas’ullarga ogohlantirishlar berildi, ayrim holatlarda esa qonunchilikda belgilangan tartibda choralar ko‘rildi.

Bozorlardagi mahsulot turlari va ularni saqlash qoidalari:

Veterinariya va sanitariya qoidalariga ko‘ra, dehqon bozorlarida quyidagi talablar majburiy hisoblanadi:

• Go‘sht va go‘sht mahsulotlari
  Faqat veterinariya ko‘rigidan o‘tgan, muhrlangan va tegishli hujjatlarga ega bo‘lishi lozim. Go‘sht +0…+4 °C haroratda maxsus sovitkichlarda saqlanishi kerak.
• Sut va sut mahsulotlari
  Sut, qaymoq, qatiq va boshqa mahsulotlar yopiq idishlarda, quyosh nuri tushmaydigan va +2…+6 °C haroratda saqlanishi talab etiladi. Ochiq holda sotilishi qat’iyan man etiladi.
• Baliq mahsulotlari
  Yangi baliq muz ustida yoki sovitilgan holda saqlanishi, hid va tashqi ko‘rinishida buzilish alomatlari bo‘lmasligi zarur.
• Sabzavot va mevalar
  Toza, chirimasdan, zararkunandalarsiz bo‘lishi hamda yer bilan to‘g‘ridan-to‘g‘ri aloqada bo‘lmagan holda rastalarga joylashtirilishi kerak.
• Parranda mahsulotlari va tuxum
  Tuxumlar yorilmagan, toza va belgilangan qutilarda saqlanishi, parranda go‘shti esa alohida sovitkichlarda joylashtirilishi shart.

Mutaxassislar ta’kidlashicha, ushbu qoidalarga rioya etilishi aholining sog‘lig‘ini himoya qilish, oziq-ovqatdan kelib chiqadigan kasalliklarning oldini olishda muhim ahamiyat kasb etadi. Shu bois, bunday reyd tadbirlari viloyat bo‘ylab tizimli ravishda davom ettiriladi.