Buxoroda irrigatsiya kanallarini betonlashtirishda jiddiy kamchiliklar fosh etildi

O‘zbekiston Respublikasi Vazirlar Mahkamasining 2025-yil 21-oktabrdagi 660-sonli qaroriga muvofiq, Buxoro viloyatida umumiy uzunligi 63,6 kilometr bo‘lgan 6 ta irrigatsiya tarmog‘ini betonlashtirish ishlari belgilangan. Mazkur loyihalar ijrosi doirasida hududiy nazorat tadbirlari kuchaytirildi.

Jondor tumanida aniqlangan holatlar

Viloyat Qurilish va uy-joy kommunal xo‘jaligi sohasidagi hududiy nazorat inspeksiyasi tomonidan Jondor tumani “Qaroli” MFY hududidan o‘tuvchi “Zarafshon” kanali rekonstruksiyasi tekshirildi. O‘rganishlar davomida pudratchi “VARAXSHA-MAXSUSQURILISH” MChJ tomonidan bir qator qo‘pol kamchiliklarga yo‘l qo‘yilgani aniqlandi.

Xususan:

• kanalning ayrim uchastkalarida tuproq zichligi bo‘yicha laboratoriya xulosalari olinmasdan betonlashtirish ishlari bajarilgan;
• yopiq ishlar dalolatnomalari rasmiylashtirilmagan;
• tuproqni zichlashtirish uchun maxsus suv sepish texnikasi jalb qilinmagan;
• beton qalinligi va geometrik o‘lchamlar loyiha talablariga mos kelmagan.

Natijada, pudrat tashkiloti rahbariga nisbatan ma’muriy bayonnoma rasmiylashtirilib, sifatsiz bajarilgan ishlar pudratchi mablag‘i hisobidan to‘liq bartaraf etildi.

Peshku tumanida ham qonunbuzilishlar

Shuningdek, Peshku tumani “Sadir” MFY hududidagi “Varaxsho” kanali rekonstruksiyasi jarayonida ham kamchiliklar qayd etildi. Bu yerda ish olib borgan “BUKHARA STAR BUILD” MChJ loyiha va me’yoriy hujjatlar talablariga amal qilmagan.

Tekshiruvda:

• laboratoriya sinovlari va yopiq ishlar dalolatnomalarisiz beton ishlari bajarilgani;
• qurilish maydonida xavfsizlik talablariga zid ravishda texnika g‘ildiraklarini yuvish uchun maxsus joylar tashkil etilmagani

aniqlandi. Pudrat tashkiloti rahbariga nisbatan ham belgilangan tartibda choralar ko‘rildi va sifatsiz ishlar to‘liq qayta bajarildi.

Mutaxassislar ta’kidlashicha, bunday nazorat tadbirlari irrigatsiya obyektlarining uzoq muddatli va sifatli xizmat qilishini ta’minlash, byudjet mablag‘larining samarasiz sarflanishining oldini olishda muhim ahamiyatga ega.