Uy olish qiyinlashyapti: narxlar oshishda davom etmoqda

2025-yil yakunlari O‘zbekistonda ko‘chmas mulk bozorida sezilarli faollik kuzatilganini ko‘rsatdi. Review taqdim etgan Iqtisodiy tadqiqotlar va islohotlar markazi tahliliga ko‘ra, yil davomida mamlakat bo‘ylab 295 mingga yaqin uy-joy oldi-sotdi bitimi rasmiylashtirilgan. Bu ko‘rsatkich 2024-yilga nisbatan 15 foizdan ortiq o‘sish qayd etilganini anglatadi.

Hududlarda savdo keskin jonlandi

Uy-joy bitimlari soni eng tez oshgan hududlar qatorida Buxoro (25,7%), Sirdaryo (23,3%) va Samarqand (19,7%) viloyatlari yetakchilik qildi. Shu bilan birga, respublika bo‘yicha barcha bitimlarning qariyb 30 foizi Toshkent shahri hissasiga to‘g‘ri kelib, poytaxtda bir yil ichida 84 mingga yaqin xonadon sotilgan. Bu Toshkent ko‘chmas mulk bozorining hanuz eng faol segment bo‘lib qolayotganini ko‘rsatadi.

Ikkilamchi bozorda narxlar qanday o‘zgardi?

2025-yilda ikkilamchi uy-joy bozorida narxlar respublika bo‘yicha o‘rtacha 7,9 foizga oshdi. Eng yuqori yillik o‘sish:

• Surxondaryo – 19,5%
• Qoraqalpog‘iston – 15,6%
• Farg‘ona – 15,5%
• Jizzax – 14,3%

Ayni paytda ayrim hududlarda, jumladan Andijon, Sirdaryo va Xorazm viloyatlarida qisqa muddatli oylik pasayishlar ham kuzatilgan.

Eng qimmat va eng arzon hududlar

Narxlar darajasi bo‘yicha Toshkent shahri yetakchilikni saqlab qoldi — poytaxtda ikkilamchi uy-joyning o‘rtacha qiymati 1 kvadrat metr uchun 1100 dollardan oshdi. Samarqand viloyatida bu ko‘rsatkich 834 dollar, Toshkent viloyatida esa 682 dollar atrofida shakllandi.

Eng arzon uy-joylar esa Qoraqalpog‘iston Respublikasida qayd etilib, u yerda bir kvadrat metr narxi 378 dollar atrofida bo‘ldi. Shuningdek, Qashqadaryo, Sirdaryo va Xorazm viloyatlarida ham narxlar nisbatan pastligicha qolmoqda.

Poytaxt bozori barqaror, yangi uylar qimmatlashmoqda

Toshkent shahrida ikkilamchi uy-joy narxlari yil davomida deyarli barqaror bo‘lib, o‘sish atigi 0,6 foizni tashkil etdi, ayrim tumanlarda esa pasayish ham kuzatildi. Biroq birlamchi uy-joy bozorida vaziyat boshqacha — yangi qurilgan xonadonlarga talab yuqori bo‘lib, narxlar tezroq oshmoqda.

Mutaxassislar fikricha, Toshkentdagi talab va narxlar dinamikasi yaqin yillarda boshqa hududlardagi uy-joy bozoriga ham bevosita ta’sir ko‘rsatishi mumkin.