Qorako‘l, Romitan va Buxoro tumanlarida hisoblagichni chetlab o‘tib gazdan foydalanish holatlari aniqlandi (video)

Buxoro viloyatida tabiiy gazdan noqonuniy foydalanish holatlariga qarshi qat’iy choralar ko‘rilmoqda. “Hududgaz Buxoro” gaz ta’minoti filiali mahalla iste’molchilari bilan ishlash bo‘limi xodimlari tomonidan joylarda muntazam reyd tadbirlari tashkil etilib, qonunbuzarliklar aniqlanmoqda.

Xususan, Romitan tumanining “Bog‘isayidon” MFYda yashovchi fuqaro Y.O. tabiiy gaz hisoblagichini chetlab o‘tgan holda gazdan foydalangani aniqlangan. Olib borilgan hisob-kitoblarga ko‘ra, ushbu noqonuniy harakat natijasida gaz ta’minoti korxonasiga 32 million 916 ming so‘m miqdorida moddiy zarar yetkazilgan.

Shuningdek, Buxoro tumanining “Sheyxoncha” MFYda istiqomat qiluvchi fuqaro M.H.ning xonadoni tungi reyd davomida tekshirilgan. Tekshiruv natijasida iste’molchi tomonidan 77 million 527 ming so‘mlik tabiiy gazdan noqonuniy foydalanilgani aniqlangan.

Yana bir holat Qorako‘l tumanining “Tashabbus” MFYda qayd etildi. Fuqaro T.H. o‘z xonadonida hisoblagichdan tashqari, rezina shlang orqali “zangori yoqilg‘i”dan noqonuniy foydalangan. Mazkur holat bo‘yicha 16 million 242 ming so‘mlik tabiiy gaz hajmi qayta hisob-kitob qilindi.

Aniqlangan barcha qonunbuzarliklar yuzasidan belgilangan tartibda hujjatlar rasmiylashtirilib, tegishli huquqni muhofaza qiluvchi organlarga taqdim etildi. Mutasaddilar ta’kidlashicha, bunday reyd tadbirlari bundan buyon ham izchil davom ettirilib, tabiiy gazdan oqilona va qonuniy foydalanishni ta’minlash ustuvor vazifa bo‘lib qoladi.