Buxoro shahrida fevral oyidan boshlab “Elektron retsept” tizimi joriy etiladi

Buxoro viloyatida 2026-yil fevral oyidan boshlab zamonaviy “Elektron retsept” tizimi bosqichma-bosqich amaliyotga joriy etiladi. Mazkur tizim dastlab sinov tariqasida Buxoro shahridagi tibbiyot muassasalarida ish boshlaydi.

Yangi tizim doirasida shifokorlar tomonidan beriladigan retseptlar endi qog‘oz shaklida emas, balki to‘liq elektron formatda rasmiylashtiriladi. Bu dori vositalarini belgilashda aniqlik va shaffoflikni ta’minlaydi.

Buxoro viloyati SSB dan olingan ma’lumotlarga ko‘ra, yil yakuniga qadar “Elektron retsept” tizimini viloyatning boshqa shahar va tumanlarida ham joriy etish rejalashtirilgan.

Ushbu yangilik tibbiy xizmatlar sifatini oshirish, bemorlar uchun qulaylik yaratish hamda sog‘liqni saqlash tizimida zamonaviy raqamli yechimlarni keng joriy etishga qaratilgan.

Elektron retsept tizimining afzalliklari:

Elektron retsept tizimi inson omili bilan bog‘liq xatolarni keskin kamaytiradi. Shifokor yozuvi o‘qilmasligi sababli yuzaga keladigan tushunmovchiliklar butunlay bartaraf etiladi. Dorilar faqat shifokor tomonidan belgilangan tartibda berilishi ta’minlanadi. Retseptlar yagona elektron bazada saqlangani sababli ularni yo‘qotish xavfi bo‘lmaydi. Bemorlar bir xil dori vositasini takror-takror noto‘g‘ri qabul qilishdan himoyalanadi. Dorixonalarda dori aylanmasi va nazorat tizimi yanada kuchayadi. Vaqt tejalib, navbatlar qisqaradi. Tibbiy statistika va tahlillarni yuritish osonlashadi. Sog‘liqni saqlash tizimida shaffoflik va hisobdorlik oshadi. Eng muhimi, bemorlar uchun xavfsiz, qulay va zamonaviy tibbiy xizmat muhiti yaratiladi.