Buxorolik erkak saksovul kesgani uchun 10 million so‘mdan ortiq jarima to‘laydi

Kuni kecha ijtimoiy tarmoqlarda Buxoro viloyatida saksovul daraxtlari noqonuniy kesilayotgani aks etgan video tarqalib, keng muhokamalarga sabab bo‘ldi. Holat yuzasidan viloyat Ekologiya va iqlim o‘zgarishi bosh boshqarmasi hamda Qorovulbozor tuman bo‘limi inspektorlari zudlik bilan tekshiruv boshladi.

Videodagi manzara joyiga chiqib o‘rganildi. Natijada saksovulni kesib, olib ketayotgan shaxslarning kimligi aniqlandi va ularga nisbatan qonuniy choralar ko‘rildi.

Ma’lum bo‘lishicha, 3 nafar fuqaro O‘zbekiston Respublikasi Ma’muriy javobgarlik to‘g‘risidagi kodeksning 79-moddasi 1-qismi bilan javobgarlikka tortilgan. Har bir huquqbuzarga 10 million 300 ming so‘mdan jarima solindi. Bundan tashqari, tabiatga yetkazilgan zarar miqdori 3 million 480 ming so‘m etib hisoblandi.

Nega saksovul muhim?

Saksovul oddiy buta emas. U cho‘l hududlarida ekologik muvozanatni saqlab turuvchi asosiy o‘simliklardan biri hisoblanadi.

• Saksovulzorlar ko‘chma qumlarni mustahkamlaydi.
• Cho‘llanish jarayonini sekinlashtiradi.
• Shamol tezligini kamaytirib, chang-to‘zonlarning oldini oladi.
• Havoga tuz va qum zarrachalarining ko‘tarilishini to‘xtatadi.

Mutaxassislar ta’kidlashicha, 7 yoshli saksovulzor shamol tezligini deyarli to‘liq to‘xtata oladi. Bir tup saksovul 4 tonnagacha ko‘chuvchi qumni ushlab qolishga qodir.

Yana bir muhim jihat: 1 gektar saksovulzor yil davomida 1 135 kg karbonat angidrid gazini yutib, 835 kg kislorod ajratadi. Bu esa havo sifatini yaxshilab, atrof-muhit ifloslanishini kamaytiradi.

Ekologlar ogohlantiradi: bitta daraxtni kesish — bu shunchaki yog‘och yo‘qotish emas, balki butun hududning ekologik barqarorligiga zarba berish demakdir.

Saksovul — cho‘lning qalqoni. Uni asrash esa barchamizning mas’uliyatimiz.