Ba’zan qahramonlik shov-shuvsiz sodir bo‘ladi: Olotda IIB xodimi dorixonada inson hayotni saqlab qoldi (video)

Qahramonlar haqiqatan ham bor. Ular superqahramon libosida emas, oddiy forma kiyib yuradi. Faqat bir farqi bor — ular hal qiluvchi pallada ikkilanmay harakat qiladi.

Ertalab, soat taxminan 09:30 lar atrofida Olot tumani, “Navro‘z” mahallasidagi bozor hududidagi dorixonada shunday voqea sodir bo‘ldi.

Odatdagi tirband tong. Kimdir savdo qiladi, kimdir ishga shoshadi. 30 yoshlardagi bir yigit esa dorixonaga kiradi — yurak xastaligi bilan kurashayotgan bu yigit navbatdagi dori umidida edi. Ammo bir lahza ichida hammasi o‘zgardi.

Dorixona ichida “taraq” etgan ovoz yangradi. Yigit yerga quladi.

Bir zumda atrofdagilarni vahima bosdi. Tutqanoq huruji boshlangan, jag‘lari qattiq qisilgan, rangi ko‘kara boshlagan. Odamlar nima qilishni bilmay qotib qolgan pallada har bir soniya oltindan qimmat edi.

Aynan shu paytda, yaqin hududda xizmat olib borayotgan Buxoro viloyati IIB huzuridagi Qo‘riqlash xizmati Olot tumani bo‘limi xodimi — serjant Po‘latov Farid O‘rinovich ovozni eshitdi.

U o‘ylab o‘tirmadi. Yugurdi.

43 yosh, 20 yillik xizmat tajribasi va sovuqqonlik — mana shu uch omil o‘sha daqiqada hal qiluvchi bo‘ldi. Serjant Po‘latov vaziyatni bir qarashda baholadi va zudlik bilan birinchi yordam ko‘rsatishga kirishdi.

U yigitning boshini to‘g‘ri tutdi, qisilib qolgan jag‘larini ochdi, nafas yo‘lini bo‘shatdi. Eng xavflisi — tilning orqaga ketib qolishi va bo‘g‘ilish edi. Soniyalar ichida to‘g‘ri harakat qilinmasa, oqibat fojiali bo‘lishi mumkin edi.

Yana bir befarq bo‘lmagan fuqaro unga yordam berib turdi.

Va nihoyat — chuqur nafas.

Yigitning ko‘kargan yuzi asta-sekin o‘ziga kela boshladi. Qon yugurdi. Hayot qaytdi.

Agar o‘sha soniyalarda professionallik va jasorat namoyon bo‘lmaganida… Bu gapni davom ettirishning o‘zi og‘ir.

Serjant Farid Po‘latov esa bu voqeani qahramonlik deb bilmaydi:

“Men shunchaki xizmat vazifamni va insoniylik burchimni bajardim. O‘rnimda bo‘lgan oddiy fuqaro ham shunday qilgan bo‘lardi”, — deydi u kamtarlik bilan.

Lekin haqiqat shuki, u o‘sha kuni nafaqat bir insonni, balki bir oilaning umidini, kimningdir farzandini, ehtimol kimningdir otasini hayotga qaytardi.

Ba’zan qahramonlik shov-shuvsiz bo‘ladi. Medal va minbarlarsiz. Ammo inson hayoti saqlab qolingan joyda eng katta mukofot allaqachon berilgan bo‘ladi.

Buxoro sizdek farzandlari bilan faxrlanadi, serjant.