O‘zbekistonda Buyuk Britaniyaning Oksford universiteti markazi ochildi

Joriy yilining 20-fevral kuni Yangi O‘zbekiston universitetida muhim va ramziy ahamiyatga ega voqea yuz berdi. Dunyoning eng nufuzli oliy ta’lim maskanlaridan biri — Oksford universiteti bilan hamkorlikda tashkil etilgan “Oxford Hub” markazining rasmiy ochilish marosimi bo‘lib o‘tdi. Tadbirda universitet rahbariyati, xorijlik mehmonlar hamda talabalar qatnashib, yangi bosqichning boshlanishiga guvoh bo‘lishdi.

Bu tashabbus shunchaki navbatdagi hamkorlik loyihasi emas. U nafaqat O‘zbekiston, balki butun Markaziy Osiyo oliy ta’lim tizimi uchun muhim burilish sifatida baholanmoqda. Yangi O‘zbekiston universiteti mintaqada birinchi bo‘lib Oksford universiteti bilan keng qamrovli va tizimli akademik platformani yo‘lga qo‘yayotgani esa mazkur markazning ahamiyatini yanada oshiradi.

Ochilish marosimida Buyuk Britaniya parlamenti Lordlar palatasi a’zosi, Buyuk Britaniyaning Markaziy Osiyo va Ozarbayjon bo‘yicha savdo elchisi, Oksford universitetining katta tadqiqotchisi Jon Olderdays ishtirok etdi. U o‘z nutqida ta’lim va ilm-fan sohasidagi xalqaro hamkorlikni kengaytirish bugungi global jarayonda nihoyatda dolzarb ekanini ta’kidladi. Uning fikricha, bunday platformalar nafaqat tajriba almashinuvi, balki yangi ilmiy yutuqlarga yo‘l ochadi.

Jon Olderdaysning ilm-fan va ta’lim rivojiga qo‘shgan hissasi, shuningdek, xalqaro akademik aloqalarni mustahkamlashdagi xizmatlari e’tirof etilib, unga Yangi O‘zbekiston universitetining “Faxriy professori” unvoni topshirildi. Bu esa hamkorlikning naqadar yuqori darajada ekanini ko‘rsatadi.

“Oxford Hub”ning ochilishi so‘nggi yillarda amalga oshirilgan ta’lim islohotlarining mantiqiy davomi sifatida qayd etildi. U O‘zbekistonning global akademik maydonga dadil kirib borayotganini, xalqaro hamkorlikka ochiqligini va sifatli ta’lim sari qat’iy intilayotganini yaqqol namoyon etadi.