Romitanda yangi imkoniyatlar: bojxona rejimi eksportchilar uchun qanday eshiklarni ochmoqda?

Buxoro viloyatida ishlab chiqaruvchilar uchun yangi iqtisodiy imkoniyatlar yaratish yo‘lida amaliy ishlar davom etmoqda. Viloyat bojxona boshqarmasi boshlig‘i Baxtiyor Muratov boshchiligidagi navbatdagi sayyor o‘rganish bu gal Romitan tumanida tashkil etildi. Asosiy maqsad — “bojxona hududida qayta ishlash” rejimidan foydalanuvchi korxonalar safini kengaytirish va tadbirkorlarga mavjud imkoniyatlarni joyida tushuntirish.

Safar davomida mas’ullar to‘qimachilik mahsulotlari ishlab chiqarishga ixtisoslashgan “WBM ROMITEX DIROMM” MChJ faoliyati bilan yaqindan tanishdi. Korxona vakillari bilan o‘tkazilgan ochiq muloqotda ishlab chiqarish jarayonlari, xom-ashyo ta’minoti va eksport salohiyati muhokama qilindi.

Ma’lum bo‘lishicha, 2025-yil davomida korxona qiymati qariyb 10 ming AQSh dollariga teng, og‘irligi 0,1 tonna bo‘lgan zamonaviy texnologik uskunalarni import qilgan. Bu esa ishlab chiqarish jarayonini yanada takomillashtirishga xizmat qilmoqda. Bundan tashqari, joriy yilda 0,05 million AQSh dollari miqdoridagi, umumiy vazni 19 tonnaga teng paxtadan tayyorlangan kalava ip mahsulotlari Eron davlatiga eksport qilingan. Bu ko‘rsatkichlar korxonaning tashqi bozordagi faol ishtirokini yaqqol namoyon etadi.

Sayyor o‘rganish davomida tadbirkorlarga “bojxona hududida qayta ishlash” rejimining afzalliklari batafsil tushuntirildi. Xususan, xom-ashyoni bojxona to‘lovlarisiz olib kirib, tayyor mahsulotni eksport qilish orqali tannarxni kamaytirish, aylanma mablag‘ni tejash va yangi bozorlarga chiqish imkoniyatlari misollar bilan izohlandi. Bunday mexanizm allaqachon ijobiy natija bergan korxonalar tajribasi bilan asoslab berildi.

Muloqot yakunida hududdagi ishlab chiqaruvchilar uchun mavjud imkoniyatlardan to‘liq foydalanish, eksport hajmini oshirish va yangi ish o‘rinlari yaratish ustuvor vazifa sifatida belgilandi. Mutasaddilar ta’kidlashicha, bojxona tizimi bugun nafaqat nazorat organi, balki tadbirkorlikni qo‘llab-quvvatlovchi hamkor sifatida ishlamoqda.