Umra safarlari vaqtincha to‘xtatildi

Yaqin Sharqda vaziyat keskinlashgani va qator davlatlar havo hududini vaqtincha yopgani sabab Umra safarlari kechiktirildi. Bu haqda Din ishlari bo‘yicha qo‘mita matbuot xizmati rasmiy ma’lumot berdi.

Ma’lum qilinishicha, mintaqada yuzaga kelgan taranglik va havo makonidan foydalanish bo‘yicha joriy etilgan cheklovlar sabab bir qator aviaqatnovlar bekor qilinmoqda. Shu bois O‘zbekiston musulmonlari idorasi hamda turoperatorlar tomonidan tashkil etilayotgan umra ziyoratlari vaqtincha to‘xtatildi. Xususan, 2026-yil 2-mart kuni “Toshkent – Jidda” yo‘nalishida amalga oshirilishi rejalashtirilgan navbatdagi reys ham noma’lum muddatga qoldirildi.

Tashqi ishlar vazirligi fuqarolarga Yaqin Sharq hududidagi davlatlarga safar uyushtirmaslikni tavsiya qildi. Ayni paytda o‘sha mamlakatlarda bo‘lib turgan vatandoshlarimizga esa ehtiyotkorlik choralarini kuchaytirish yuzasidan zarur ko‘rsatmalar berilgan.

Havo hududi yopilishi oqibatida 48 nafar o‘zbekistonlik Doha aeroportida qolib ketgan. “Dunyo” axborot agentligi xabariga ko‘ra, Qatardagi favqulodda vaziyat sabab aviakompaniyalar yo‘lovchilarni mehmonxona bilan ta’minlay olmagan. Shundan so‘ng O‘zbekistonning Dohadagi elchixonasi xodimlari zudlik bilan aeroportga yetib borib, muzokaralar o‘tkazgan va fuqarolar vaqtinchalik mehmonxonalarga joylashtirilgan.

Elchixona ma’lumotiga ko‘ra, Qatar havo hududi ochilib, parvozlar tiklanishi bilan yurtdoshlarimizning vatanga xavfsiz qaytishi ta’minlanadi. Vaziyat doimiy nazoratda ekani, yo‘lovchilar ro‘yxati muntazam yangilanayotgani ta’kidlangan. Diplomatik vakolatxona fuqarolarni vahimaga berilmaslikka, faqat rasmiy manbalarga tayanishga hamda xavfsizlik qoidalariga qat’iy amal qilishga chaqirmoqda.

Qo‘shimcha qilinishicha, Yaqin Sharqdagi so‘nggi voqealar fonida Qatarda bo‘lib turgan qariyb 600 nafar O‘zbekiston fuqarosi orasida jabrlanganlar aniqlanmagan. Aviaqatnovlar qayta tiklanishi yuzasidan qo‘shimcha axborot rasmiy manbalar orqali e’lon qilinadi.