Aktyor Murilo Benisio “Klon” serialidagi 3 ta turli xarakterli qahramonlarni qanday ijro etgan edi?

Telenovellalar tarixida bir aktyorning egizak yoki aka-uka rolini o‘ynashi kam uchraydigan holat emas. Biroq Murilo Benisioning Braziliyaning mashhur “Klon” (O Clone) serialidagi ijrosi aktyorlik mahoratining eng yuksak cho‘qqisini namoyish etgan edi. Bu serial nafaqat Janubiy Amerikada, balki butun dunyoda, shu jumladan O‘zbekistonda mashhur bo‘lgan. Daryo maqolasida shular haqda so‘z boradi.

U bir serialning o‘zida uchta murakkab qahramonni — xotirjam va o‘ychan Lukas Ferras, uning serg‘ayrat ukasi Diogu Ferras va laboratoriyada yaratilgan Leo ismli klonni gavdalantirdi. Eng ajablanarlisi shundaki, ularning har biri o‘zining individual xarakteri, so‘zlashish uslubi, harakatlari va odatiga ega bo‘lib, tomoshabinlar ularni ekranning birinchi soniyasidanoq bexato ajrata olar edi.

Serial boshida tomoshabinlar aka-uka Ferraslar — xayolparast Lukas hamda uning shijoatli akasi Diyego bilan tanishadi. Murilo Benisio uchun bu loyiha haqiqiy aktyorlik marafoni edi. U har bir qahramon uchun nafaqat tashqi ko‘rinishini, balki ruhiy holatni ham chuqur o‘zgartirishi kerak edi. Lukas ko‘proq introvert inson bo‘lsa, Diyego yuragida o‘ti bor, har doim oldinga intiluvchi shaxsdir. Benisio shunchaki kiyimlarini almashtirish bilan chegaralanmasdi, suratga olish maydonida u o‘z-o‘zi bilan muloqot qilar, qarindosh bo‘lsa-da, ruhiy jihatdan butunlay qarama-qarshi bo‘lgan ikki kishini tasvirlardi.

Dioguning vertolyotdagi fojiali halokati butun serial tarixining eng muhim burilish nuqtasi bo‘ldi. Aynan bu hodisa keyinchalik Doktor Albyerining birinchi inson klonini yaratish qaroriga turtki bo‘ldi.

Qahramon o‘z qiyofadoshi bilan to‘qnash kelgan sahna

Leonning paydo bo‘lishi Murilo Benisio uchun katta sinov bo‘ldi. Lukasning kloni bo‘lgan Leo biologik jihatdan uning yoshroq nusxasi bo‘lsa-da, u ham o‘z xarakteriga ega, hayotiy tajribasi yo‘q, biroz telbaroq edi. Uning hech qanday o‘tmish xotiralari yo‘q bo‘lgani sababli o‘smir yigit tez-tez sarosimaga tushardi. Benisio shu vaqtda yoshi qirqqa yaqinlashgan, oilali Lukas, hamda laboratoriyada yaratilgan, atigi 18 yoshli Leoni gavdalantirgan.

“Eng qiyin ish keyin boshlandi, men ham Lukas va ham Leoni ijro eta boshladim. Doimiy kiyim almashtirish, murakkab grim, ovoz ohangini va yurish-turishimni o‘zgartirishdan juda charchar edim”, deydi aktyor o‘sha mashaqqatli davrni eslab.

2000-yillarning boshi uchun “Klon” seriali texnologiya jihatdan juda ilg‘or asar edi. Lukas va Leo bir kadrda bir vaqtning o‘zida paydo bo‘ladigan sahnalar kompyuter grafikasidan foydalangan holda yaratilgan. Bu esa o‘sha paytdagi Braziliya televideniyesi uchun eng qimmat va innovatsion tajriba bo‘lgan. Benisio esa har bir sahnani turli insonlarni muloqot qilayotgandek tasavvur qilib, ikkita alohida dublda ijro etishi shart bo‘lgan.

Serial ijodkorlari ta’kidlashicha, aynan Muriloning rollarga psixologik jihatdan chuqur kirishishi tufayli serial qahramonlari juda ishonarli va ta’sirli chiqqan.

“Klon” finalida qahramonlar taqdiri bir-biriga bog‘lanadi: tirik inson va uning genetik nusxasi yuzma-yuz keladi. Benisio uchun bu uzoq muddatli mehnatining mahsuli edi.