Buxoroda fuqaroga xonadon ichida “butilka” bilan zo‘rlik qilish bilan tahdid qilib, pul talab qilgan narkomanlar ushlandi (video)

Respublika miqyosida o‘tkazilayotgan “Xavfsiz va sog‘lom yurt” tadbirlari doirasida Buxoro viloyati Ichki ishlar boshqarmasi, tezkor qidiruv xizmati hamda Davlat xavfsizlik xizmati xodimlari hamkorligida yirik operatsiya o‘tkazildi. Natijada tovlamachilik va giyohvandlik bilan shug‘ullanuvchi jinoiy guruh faoliyatiga chek qo‘yildi.

Jinoyat qanday sodir etilgan?

2026-yilning 16-mart kuni bir guruh shaxslar o‘zaro til biriktirib, tanish bo‘lgan fuqaroni Buxoro shahridagi Zulfiya ko‘chasida joylashgan xonadonga «hisob-kitob qilish» bahonasi bilan chaqirtirishgan.

Ular jabrlanuvchiga nisbatan:

• Jismoniy kuch ishlatishgan;
• Ruhiy tazyiq o‘tkazib, qadr-qimmatini kamsituvchi harakatlar sodir etishgan;
• Hayotiga suiqasd qilish bilan qo‘rqitishgan.

Guruh a’zolari jabrlanuvchidan 15 million so‘m miqdoridagi pulni tovlamachilik yo‘li bilan talab qilishgan. Shuningdek, jinoyatni yashirish maqsadida fuqaroni giyohvandlik moddasini iste’mol qilishga majburlashgan.

Tadbir davomida aniqlanishicha, guruh a’zolari orasida:

1. Sport bilan shug‘ullanuvchi yoshlar;
2. Voyaga yetmagan shaxslar ham bo‘lgan. Ular o‘zlari ham muntazam ravishda giyohvandlik moddalarini iste’mol qilib kelishgan.

17-mart kuni o‘tkazilgan tadbirda gumonlanuvchilar talab qilingan 15 million so‘mni olayotgan vaqtida ashyoviy dalillar bilan qo‘lga olindi. Xonadon ko‘zdan kechirilganda gashish giyohvandlik moddasi hamda jabrlanuvchiga nisbatan zo‘rlik ishlatishda foydalanish maqsad qilingan shisha idish topildi.

Hozirda gumonlanuvchilarga nisbatan O‘zbekiston Respublikasi Jinoyat kodeksining quyidagi moddalari bilan jinoyat ishi qo‘zg‘atildi:

• 165-modda, 2-qismi «v» bandi (Tovlamachilik);
• 274-modda (Giyohvandlik vositalarini iste’mol qilishga majburlash);
• 276-modda (Giyohvandlik vositalarini qonunga xilof ravishda saqlash).