Buxoroda bankdan olgan kreditini to‘lamagan fuqaroning Matiz avtomashinasi savdoga chiqarildi

Majburiy ijro byurosining Olot tumani bo‘limi ish yurituvida bo‘lgan ijro hujjatiga asosan kredit qarzdorligini majburiy undirish choralari ko‘rilmoqda.

Ma’lumotlarga ko‘ra, qarzdor fuqaro K.A. dan Kapitalbank foydasiga 52 mln so‘m kredit qarzi undirish belgilangan. Shuningdek, undiruv qarzdorga tegishli garov mulki — “Matiz” rusumli avtomobilga qaratilgan.

Qarzdorga qarzni ixtiyoriy ravishda to‘lash uchun muddat berilgan bo‘lsa-da, belgilangan vaqt ichida qarzdorlik bartaraf etilmagan.

Ijro harakatlari davomida avtomashinaga nisbatan qidiruv e’lon qilinib, u aniqlangach, belgilangan tartibda jarima maydonchasiga joylashtirilgan.

Qarzdorlik o‘z vaqtida qoplanmagani sababli, mazkur avtomobil elektron onlayn auksion savdolariga chiqarilgan.

Savdodan tushgan mablag‘lar to‘liq ravishda kredit qarzini qoplashga yo‘naltiriladi.

Mazkur holat kredit majburiyatlarini o‘z vaqtida bajarish muhimligini yana bir bor ko‘rsatmoqda.