Olot tumanidagi bojxona postida 527 mln so‘mlik yashirilgan yuk aniqlandi

Buxoro viloyatida bojxona tartiblarini buzishga urinish bilan bog‘liq holat fosh etildi. Mazkur qonunbuzarlik Olot chegara bojxona postida aniqlangan.

Ma’lum qilinishicha, xorijiy davlatdan import qilingan yuk bojxona xodimlari tomonidan belgilangan tartibda ko‘rikdan o‘tkazilgan. Jarayonda tovarlarni klassifikatsiyalash bo‘yicha mutaxassislar ham ishtirok etgan.

Tekshiruv davomida bojxona yuk deklaratsiyasida ko‘rsatilmagan, umumiy qiymati 527 million so‘mlik agroximiya preparatlari mavjudligi aniqlangan.

Dastlabki hisob-kitoblarga ko‘ra, mazkur mahsulotlar uchun 70 million so‘mlik bojxona to‘lovlari to‘lanishi lozim bo‘lgan. Biroq to‘lovlardan qochishga urinish oqibatida ushbu yuklar vaqtincha saqlovga olingan.

Shuningdek, aniqlangan noqonuniy yuk hajmi 4 tonnadan ortiq ekani qayd etildi.

Mazkur holat bojxona tartiblariga qat’iy rioya etish zarurligini yana bir bor ko‘rsatmoqda.
Bojxona organlari tomonidan iqtisodiy xavfsizlikni ta’minlash va noqonuniy aylanmalarga chek qo‘yish bo‘yicha nazorat tadbirlari izchil davom ettirilmoqda.