Buxoro xalqaro aeroportida “Buxoro–Novosibirsk–Buxoro” yo‘nalishida ilk parvoz amalga oshirildi

Kecha, 3-aprel kuni “Uzbekistan Airways” aviakompaniyasining Buxoro–Novosibirsk–Buxoro yo‘nalishida ilk parvoz muvaffaqiyatli amalga oshirildi. Mazkur yangi yo‘nalish ochilishi munosabati bilan aeroportda keng ko‘lamli bayram tadbiri tashkil etildi. Tadbir aeroport hududida ko‘tarinki ruhda, milliy an’analarimizga xos tarzda bezatilgan muhitda o‘tkazildi.

Buxoroisharif.uz ga ma’lum qilinishicha, tantanali marosim davomida ishtirokchilar uchun milliy raqslar ijro etilib, mehmonlarga o‘zbekona mehmondo‘stlik namunasida turli milliy taomlar tortildi. Ayniqsa, sayil ruhida tashkil etilgan chiqishlar yo‘lovchilarga va mehmonlarga unutilmas taassurotlar ulashdi. Aeroportda hukm surgan bayramona muhit barcha ishtirokchilarning kayfiyatini ko‘tarib, ushbu tarixiy voqeaga alohida fayz bag‘ishladi.

Yo‘lovchilar ro‘yxatdan o‘tkazilish jarayonida ularga qulay sharoitlar yaratilib, xizmat ko‘rsatish sifati yuqori darajada tashkil etildi. Tantanali ochilish marosimida qatnashganlar yangi yo‘nalishning ochilishini hudud uchun muhim transport yangiligi sifatida e’tirof etdilar. Ushbu aviaqatnov ikki shahar o‘rtasidagi aloqalarni mustahkamlash va yangi imkoniyatlar yaratishda muhim qadam ekani ta’kidlandi.

Parvoz oldidan yo‘lovchilarga samimiy tilaklar bildirilib, ular uchun maxsus bayramona dastur tashkil etildi. Yo‘lovchilar esa bunday e’tibor va tashkiliy ishlar uchun o‘z minnatdorligini bildirib, yuqori kayfiyatda safarga otlandilar. Shundan so‘ng samolyot belgilangan vaqtda havoga ko‘tarilib, yo‘lovchilarni o‘z manziliga olib yo‘l oldi.

Ma’lumot o‘rnida ta’kidlash joizki, ushbu yo‘nalish bo‘yicha reyslar haftasiga bir marotaba — juma kunlari amalga oshiriladi. Yangi aviaqatnovning yo‘lga qo‘yilishi Buxoroning turizm salohiyatini oshirish, xorijiy sayyohlar oqimini ko‘paytirish hamda hududning xalqaro nufuzini yuksaltirishga xizmat qiladi.

Shuningdek, bu yo‘nalish orqali Buxoro va Novosibirsk o‘rtasida iqtisodiy, madaniy va savdo aloqalari yanada rivojlanishi kutilmoqda. Mutaxassislar fikricha, bunday yangi reyslar ochilishi nafaqat yo‘lovchilar uchun qulaylik yaratadi, balki hududlar o‘rtasidagi hamkorlikni mustahkamlashda ham muhim omil bo‘lib xizmat qiladi. Kelgusida esa yana yangi xalqaro yo‘nalishlarni ochish orqali aviatsiya imkoniyatlarini kengaytirish rejalashtirilmoqda.