Jahongir Shodiyev Buxoro viloyat bolalar ko‘p tarmoqli tibbiyot markaziga bosh vrachi etib tayinlandi

Kuni kecha Buxoro viloyati sog‘liqni saqlash boshqarmasi boshlig‘ining tegishli buyrug‘iga asosan Jahongir Ahatovich Shodiyev viloyat bolalar ko‘p tarmoqli tibbiyot markazi bosh vrachi etib tayinlandi.

Jahongir Shodiyev 1990-yilda Kogon tumanida tug‘ilgan. U 2014-yilda Buxoro davlat tibbiyot institutini davolash ishi yo‘nalishi bo‘yicha tamomlagan.

Shuningdek, u otolaringologiya mutaxassisligi bo‘yicha klinik ordinaturani o‘tagan hamda tibbiyot fanlari falsafa doktori (PhD) ilmiy darajasiga ega.

Mutaxassis sifatida otolaringolog, tibbiy pedagog hamda yuz-jag‘ xirurgiyasi yo‘nalishlarida faoliyat yuritib kelgan.

Tayinlovga qadar u mazkur markazning yuz-jag‘ xirurgiyasi va otolaringologiya bo‘limi mudiri lavozimida ishlab kelayotgan edi.

Yangi rahbarning tayinlanishi markaz faoliyatini yanada rivojlantirish, bolalar salomatligini muhofaza qilish borasidagi ishlarni yangi bosqichga olib chiqishga xizmat qilishi kutilmoqda.

Xususan, zamonaviy davolash usullarini joriy etish, yuqori malakali mutaxassislar tayyorlash hamda tibbiy xizmat sifatini oshirish ustuvor vazifalardan biri bo‘lib qoladi.

Bundan tashqari markazda innovatsion texnologiyalarni keng qo‘llash, murakkab kasalliklarni erta aniqlash va samarali davolash tizimini takomillashtirishga alohida e’tibor qaratilishi rejalashtirilmoqda.