Oliy sud raisi o‘rinbosari Malikaxon Kalandarova buxorolik talabalar bilan uchrashdi

Kuni kecha Buxoro davlat universitetida “Yurisprudensiya” yo‘nalishida tahsil olayotgan talaba-qizlar uchun qiziqarli va foydali ochiq muloqot tashkil etildi. Unda Oliy sud raisi o‘rinbosari, Ayol sudyalar assosiatsiyasi raisi M. Kalandarova, viloyat hokimi o‘rinbosari X. Artikova hamda hududda faoliyat yuritayotgan ayol sudyalar ishtirok etdi.

Uchrashuv davomida sudyalar yoshlar bilan ochiq suhbat qurib, huquqiy bilimlarni oshirish, sud-huquq tizimida olib borilayotgan o‘zgarishlarni tushunish qanchalik muhim ekanini sodda misollar orqali tushuntirib berishdi. Ishtirokchilar bunday uchrashuvlar ayniqsa talaba-qizlar uchun foydali ekanini ta’kidlashdi.

Muloqot jarayonida M. Kalandarova xotin-qizlarning huquqlarini himoya qilish, ularning sud tizimidan erkin va samarali foydalanishi uchun yaratilayotgan imkoniyatlar haqida gapirib berdi. Shuningdek, sud tizimida ayollar soni ortib borayotgani, bugungi kunda 1 589 nafar sudyadan 245 nafari ayollar ekani qayd etildi.

Suhbat davomida sudyalik kasbi haqida ham samimiy fikrlar bildirildi. Bu kasb nafaqat bilim, balki katta mas’uliyat, halollik va adolatga sodiqlikni talab qilishi alohida ta’kidlandi. Har bir qarorda inson huquqlari va qonun ustuvorligi eng muhim mezon bo‘lishi kerakligi qayd etildi.

Talaba-qizlar uchrashuvda faol qatnashib, o‘zlarini qiziqtirgan savollarni berishdi. Ular sud tizimiga kirish, kasbiy rivojlanish va kelajakdagi imkoniyatlar haqida batafsil javoblar olishdi.

Samimiy ruhda o‘tgan uchrashuv yoshlar uchun katta motivatsiya bo‘ldi. Ishtirokchilarga o‘z ustida ishlash, bilimini oshirish va kelajakda jamiyat uchun foydali mutaxassis bo‘lishga intilish tavsiya etildi.