Ertaga, 28-aprel kuni Cobalt’ga shartnoma ochilishini e’lon qildi

UzAuto Motors kompaniyasi Chevrolet Cobalt avtomobillari uchun onlayn kontraktatsiya boshlanishini e’lon qildi. Bu haqda kompaniya axborot xizmati xabar berdi.

Ma’lum qilinishicha, Cobalt’ga bo‘lgan yuqori talab hamda mijozlardan kelib tushayotgan ko‘plab murojaatlar inobatga olinib, kontraktatsiya jarayoni barcha komplektatsiyalar uchun ochiladi.

2026-yil 28-aprel kuni soat 10:00 dan boshlab barcha mijozlar uchun onlayn shartnomalar ochiladi. Avtomobil xarid qilish uchun shartnomani uzavtosavdo.uz sayti orqali rasmiylashtirish yoki yaqin hududdagi Chevrolet rasmiy dilerlik markaziga murojaat qilish mumkin.

Shuningdek, Telegram bot va UzAvtoSavdo mobil ilovasi (iOS/Android) orqali navbatni kuzatish hamda mavjud avtomobillar haqida tezkor ma’lumot olish imkoniyati yaratilgan.

Kompaniya tuzilgan shartnomalar bo‘yicha to‘lov 7 kalendar kun ichida amalga oshirilishi lozimligini eslatdi.

Bundan tashqari, shartnomalarda maxsus QR-kod bo‘lishi shartligi qayd etildi. Ushbu kod hujjatning haqiqiyligini tasdiqlaydi. QR-kodsiz shartnomalar UzAuto Motors va rasmiy dilerlarga aloqador emasligi bildirildi.

Savollar yuzasidan mijozlar +998 (78) 141-77-77 raqamli Call markazga murojaat qilishi mumkin. Qo‘shimcha ma’lumotlar kompaniyaning rasmiy sayti orqali taqdim etiladi.