O‘zbekistonda soxta tadbirkorlik uchun javobgarlik kuchaytirildi

O‘zbekistonda 19-iyuldan kuchga kiradigan yangi qonun bilan O‘zbekiston Respublikasi Jinoyat kodeksi 179-moddasiga muhim o‘zgartirishlar kiritilib, soxta tadbirkorlik uchun javobgarlik sezilarli darajada kuchaytirildi.

Yangilangan tartibga ko‘ra, tadbirkorlik faoliyatini yuritish niyatisiz, ya’ni ssuda va kreditlar olish, soliqlardan qochish yoki boshqa mulkiy manfaat ko‘rish maqsadida korxona tashkil etgan shaxslar qat’iy jazolanadi. Endilikda bunday huquqbuzarliklar uchun BHMning 100 baravaridan 200 baravarigacha — ya’ni 41,2 million so‘mdan 82,4 million so‘mgacha jarima solinishi mumkin. Shuningdek, 3 yilgacha axloq tuzatish ishlari, muayyan huquqlardan mahrum qilish, 1 yildan 3 yilgacha ozodlikni cheklash yoki ozodlikdan mahrum qilish jazolari ham qo‘llanadi.

Qonun bilan soliqlardan bo‘yin tovlashga qarshi choralar ham kuchaytirildi. Endi foyda yoki soliq solinadigan obyektlarni qasddan yashirish, kamaytirib ko‘rsatish holatlarida fuqarolar BHMning 15 baravaridan 25 baravarigacha — 6,18 million so‘mdan 10,3 million so‘mgacha jarimaga tortiladi.

Bundan tashqari, 16-apreldan kuchga kirgan Prezident qaroriga muvofiq, tadbirkorlar uchun muhim yengillik ham joriy etildi. Ya’ni, moliyaviy jarimaning 50 foizi 1 oy ichida to‘lansa, qolgan qismi bekor qilinadi. Bu esa qonuniy faoliyat yuritayotgan tadbirkorlar uchun qo‘shimcha imkoniyat yaratadi.

Shuningdek, ijtimoiy yo‘nalishdagi tadbirkorlik ham qo‘llab-quvvatlanmoqda. Xususan, nogironligi bo‘lgan bolalarga kunduzgi parvarish xizmatlarini ko‘rsatuvchi tadbirkorlar 2030-yil 1-yanvargacha barcha turdagi soliqlardan ozod etiladi.

Yangi tartiblar orqali davlat nafaqat noqonuniy moliyaviy sxemalarga chek qo‘yishni, balki halol biznes yuritayotgan tadbirkorlar uchun yanada adolatli va barqaror muhit yaratishni maqsad qilmoqda.