Buxoro viloyati hokimi o‘rinbosari Hafiza Artikova pillakor ayollar xonadonida bo‘ldi

Buxoro tumanida pillachilik mavsumi qizg‘in pallaga kirgan bo‘lib, hudud pillakorlari joriy mavsumda qariyb 260 tonna “kumush tola” yetishtirishni maqsad qilgan. Tuman bo‘ylab mavsumga puxta tayyorgarlik ko‘rilib, ipak qurti parvarishi tizimli va izchil yo‘lga qo‘yilgan.

Xususan, “Romstar” MChJ tomonidan 2900 nafardan ortiq kasanachilar bilan shartnomalar tuzilib, jonlantirilgan ipak qurti urug‘lari o‘z vaqtida yetkazib berildi. Bu esa oilaviy bo‘ginlar faoliyatini yo‘lga qo‘yib, ishlab chiqarish samaradorligini oshirishga xizmat qilmoqda. Pillachilik bilan shug‘ullanayotgan xonadonlarda zarur sharoitlar yaratilgani, parvarish jarayonlari mutaxassislar tomonidan nazorat qilinayotgani ta’kidlanmoqda.

Jarayon bilan tanishish maqsadida viloyat hokimi o‘rinbosari, Oila va xotin-qizlar boshqarmasi boshlig‘i Hafiza Artikova hududga tashrif buyurib, sanoat usulida ipak qurti boqish jarayonini ko‘zdan kechirdi. U ilg‘or pillakorlar bilan uchrashib, ularning tajribasi, ish uslublari hamda erishayotgan natijalari bilan yaqindan tanishdi.

Uchrashuv davomida pillachilikni yanada rivojlantirish, hosildorlikni oshirish va sifatli mahsulot yetishtirish bo‘yicha tavsiyalar berildi. Ilg‘or pillakorlar mehnati e’tirof etilib, ular rag‘batlantirildi.

Hududda pillachilik nafaqat iqtisodiy daromad manbai, balki aholi bandligini ta’minlashda ham muhim yo‘nalishlardan biri bo‘lib qolmoqda. Ayniqsa, kasanachilik asosida tashkil etilgan ishlar orqali minglab xotin-qizlar va yoshlar daromad topmoqda. Mutaxassislar tomonidan ipak qurti parvarishida zamonaviy agrotexnik usullar qo‘llanilishi natijadorlikni oshirayotgani qayd etilmoqda.

Pillachilikda sifatli hosil olish uchun oziqa bazasi, xususan, tut daraxtlarini parvarishlashga ham alohida e’tibor qaratilmoqda. Mavsum davomida har bir bosqich — urug‘ tarqatishdan tortib, pilla topshirishgacha bo‘lgan jarayonlar qat’iy nazorat ostida olib borilmoqda. Bu esa belgilangan reja ko‘rsatkichlariga erishishda muhim omil bo‘lib xizmat qiladi.

Shuningdek, sohada kooperatsiya aloqalarini kengaytirish, qayta ishlash tizimini rivojlantirish va eksport salohiyatini oshirish ustida ham ishlar olib borilmoqda. Mutasaddilar kelgusida pillachilikni yanada modernizatsiya qilish orqali yuqori qo‘shimcha qiymatli mahsulotlar ishlab chiqarishni yo‘lga qo‘yish zarurligini ta’kidlashmoqda.

Pillachilik mavsumi yakunida nafaqat reja bajarilishi, balki hudud aholisi daromadlarining oshishi ham kutilmoqda. Bu esa qishloq joylarda iqtisodiy faollikni kuchaytirish va ijtimoiy barqarorlikni ta’minlashga xizmat qiladi.