Nyu-Yorkda Yulduz Usmonova konserti bekor qilindi

AQShning Nyu-York shahrida 9-may kuni bo‘lib o‘tishi rejalashtirilgan Yulduz Usmonova konserti bekor qilindi. Tadbir Bruklindagi Oceana Theater sahnasida o‘tkazilishi kerak edi.

Konsertning bekor qilinishi mahalliy siyosatchilar va ayrim jamoatchilik vakillari tomonidan bildirilgan qarshiliklar ortidan yuz berdi. Xonandaning Falastin masalasidagi chiqishlari sabab unga nisbatan tanqidlar kuchaygani aytilmoqda.

4-may kuni o‘tkazilgan matbuot anjumanida bir qator siyosatchilar mazkur konsertga qarshi chiqib, uni o‘tkazmaslik bo‘yicha chaqiriqlar bilan chiqdi. Shuningdek, ayrim faollar xonandani keskin bayonotlari sabab tanqid ostiga olgan.

Shu fon’da konsert mezbonlari tadbirni bekor qilishga qaror qilganini e’lon qildi. Tashkilotchilar bu qaror xavfsizlik va jamoatchilik bosimi bilan bog‘liq ekani haqida ma’lum qilgan.

Usmonova esa ushbu vaziyatga munosabat bildirib, o‘z qarashlarida qat’iy qolishini ta’kidladi. Uning so‘zlariga ko‘ra, u ilgari bildirgan fikrlari uchun uzr so‘ramaydi va o‘z pozitsiyasini o‘zgartirmaydi.

Xonanda, shuningdek, konsert uchun barcha chiptalar sotib bo‘linganini bildirib, muxlislariga minnatdorlik izhor qilgan. U kelgusida ham ijodini davom ettirishini va “insoniyat uchun kuylashdan to‘xtamasligini” aytdi.

Eslatib o‘tamiz, Yulduz Usmonova Isroilning Falastinga nisbatan harakatlarini faol tanqid qilib keladi. U 2023-yil oktabrida Isroil mahsulotlariga boykot e’lon qilgan.

Mazkur holat san’at va siyosat kesishgan nuqtada yuzaga kelgan yana bir voqea sifatida baholanmoqda. So‘nggi yillarda san’atkorlarning siyosiy qarashlari sabab turli davlatlarda konsertlar bekor qilinishi holatlari ko‘paymoqda.

Mutaxassislar fikricha, bunday vaziyatlar jamoatchilik fikri va siyosiy omillarning madaniy tadbirlarga ta’siri ortib borayotganini ko‘rsatadi. Shu bilan birga, bu holatlar so‘z erkinligi va san’at erkinligi masalalarini ham yana kun tartibiga olib chiqmoqda.

Kuzatuvchilarga ko‘ra, bu voqea xalqaro maydonda san’atkorlarning ijtimoiy pozitsiyasi qanchalik muhim ahamiyat kasb etayotganini yana bir bor namoyon etdi.

Kelgusida bunday bahsli holatlarning kamayishi yoki aksincha ko‘payishi esa global siyosiy muhit va jamoatchilik kayfiyatiga bevosita bog‘liq bo‘lib qolmoqda.