Google qidiruv tizimini sun’iy intellekt yordamida tubdan yangilamoqda

Google o‘zining yillik Google I/O 2026 konferensiyasida sun’iy intellektga asoslangan yangi mahsulotlar va yirik yangilanishlarni taqdim etdi.

Kompaniya rahbari Sundar Pichai yangi davrni “agentik era” deb atadi. Unga ko‘ra, endilikda Google’ning sun’iy intellekti (SI) foydalanuvchi topshiriqlarini mustaqil bajarishga qodir bo‘ladi.

Pichaining aytishicha, SI-agentlar kompaniyaning ko‘plab mahsulotlariga, jumladan Google Search va Gemini tizimlariga integratsiya qilinadi.

“Google Search” 25 yildagi eng katta yangilanishni oldi

Google o‘zining qidiruv tizimini “so‘nggi 25 yildagi eng katta yangilanish” deb atadi.

Endilikda foydalanuvchilar kalit so‘zlarni qidirish o‘rniga, oddiy tilda aynan nima kerakligini yozishi mumkin bo‘ladi. Sun’iy intellekt esa kontekstni tushungan holda aniqroq javob beradi.

Masalan, foydalanuvchi kulolchilik bilan shug‘ullanishni istab, seshanba kechalari yoki dam olish kunlari yaqinidagi kurslarni topishni so‘rashi mumkin. AI unga mos variantlarni taklif qiladi va keyingi savollarda ham oldingi kontekstni saqlab qoladi.

Shuningdek:

• to‘y rejalashtirish,
• ko‘chish,
• uzoq muddatli vazifalarni boshqarish

uchun maxsus AI-agentlar yaratiladi. Ular foydalanuvchi uchun mini-ilovalar va boshqaruv panellarini shakllantiradi.

Gemini’ning yangi modellari taqdim etildi

Google yangi Gemini Omni modelini ham namoyish etdi.

Kompaniya ma’lumotiga ko‘ra, bu model:

• video,
• rasm,
• audio,
• matn

bilan birgalikda ishlay oladi va yuqori sifatli videolar yaratadi.

Foydalanuvchi oddiy matn orqali video tahrir qilishi mumkin bo‘ladi. Masalan, “oynani suyuqlik kabi harakatlantir va qo‘lni metallga aylantir” kabi buyruqlar bilan video effektlar hosil qilinadi.

Bundan tashqari:

• Gemini 3.5 Flash — tezkor va arzonroq model,
• Gemini 3.5 Pro — yanada kuchli versiya sifatida e’lon qilindi.

SI Google xizmatlarining barchasiga kirib kelmoqda

Kompaniya sun’iy intellektni boshqa xizmatlariga ham keng integratsiya qilmoqda.

Yangi funksiyalar orasida:

• Gmail’da ovozli qidiruv,
• Docs Live orqali ovoz bilan hujjat yaratish,
• YouTube’da “Ask” funksiyasi,
• SI yordamida surat tahrirlash

kabi imkoniyatlar mavjud.

YouTube platformasida esa foydalanuvchilarga qiziqishlariga mos videolar va aynan kerakli fragmentlar avtomatik ko‘rsatiladi.

Google SI-ko‘zoynaklarga ham katta stavka qilmoqda

Google yangilangan Android XR Glasses aqlli ko‘zoynaklarini ham namoyish etdi.

Kompaniya ikki turdagi qurilma ustida ishlamoqda:

• audio-ko‘zoynaklar,
• displeyli ko‘zoynaklar.

Ular orqali foydalanuvchi:

• yo‘nalish olishi,
• suratga olishi,
• tarjima qilishi,
• ko‘rayotgan obyekt haqida ma’lumot olishi mumkin bo‘ladi.

Google bu borada Warby Parker va Gentle Monster bilan hamkorlik qilayotganini ma’lum qildi. Aqlli audio-ko‘zoynaklar kuzgi kolleksiyalar bilan sotuvga chiqariladi.