Buxoroda qo‘l jangi bo‘yicha Amir Temur kubogi turniri o‘tkaziladi

29–30-may kunlari Universal Sport Majmuasida qo‘l jangi sport turi bo‘yicha kattalar va o‘smirlar o‘rtasida Amir Temur Kubogi bo‘lib o‘tadi.

Nufuzli xalqaro musobaqada O‘zbekiston bilan bir qatorda Qirg‘iziston, Italiya, Turkiya, Qozog‘iston, Belarus hamda Rossiyadan tashrif buyurgan kuchli sportchilar ishtirok etadi. Turnir davomida sportchilar o‘zlarining jismoniy tayyorgarligi, texnik mahorati va matonatini namoyish etadi.

Musobaqa davomida muxlislarni keskin va murosasiz bellashuvlar, yuqori sport ruhi hamda yorqin g‘alabalar kutmoqda. Turnir yosh sportchilar uchun katta tajriba maktabi vazifasini o‘tashi bilan ham ahamiyatlidir.

Qo‘l jangi sport turi so‘nggi yillarda yurtimizda tobora ommalashib, xalqaro maydonda ham o‘zbekistonlik sportchilarning muvaffaqiyatlari ortib bormoqda. Mazkur musobaqa esa ushbu sport turini yanada rivojlantirish, tajriba almashish va xalqaro sport aloqalarini mustahkamlashga xizmat qiladi.

Turnir doirasida sportchilar o‘rtasida turli vazn toifalarida bellashuvlar tashkil etilishi rejalashtirilgan. Musobaqalarda professional hakamlar guruhi faoliyat olib boradi. Xalqaro turnirga xorijiy delegatsiyalar, murabbiylar va sport mutaxassislari ham tashrif buyurmoqda.

Bunday yirik sport anjumanlarining Buxoroda o‘tkazilishi viloyatning xalqaro sport markazlaridan biriga aylanib borayotganidan dalolat beradi. Shu bilan birga, turnir yoshlarni sportga keng jalb qilish, sog‘lom turmush tarzini targ‘ib etish va vatanparvarlik ruhini mustahkamlashga xizmat qiladi.

Musobaqa davomida xavfsizlik, tibbiy xizmat va sportchilarga yaratilgan sharoitlarga ham alohida e’tibor qaratiladi. Tashkilotchilar barcha ishtirokchilar va mehmonlar uchun qulay muhit yaratishni maqsad qilgan.

Eslatib o‘tamiz, qo‘l jangi sporti bo‘yicha Amir Temur Kubogi Shavkat Mirziyoyevning 2022-yil 20-iyundagi PQ–287-son qaroriga muvofiq tashkil etib kelinmoqda.

Barcha sport ixlosmandlari ushbu yirik xalqaro sport bayramiga taklif etiladi.