Bugun Qorovulbozorliklarga 10 milliondan ortiq yordam pullari tarqatildi

O‘zbekiston Qizil yarim oy jamiyati mamlakatimizdagi keksa jamoat tashkiloti hisoblanadi. Jamiyat o‘z faoliyatida insonparvarlik tamoyillariga tayanadi. Qizil Xoch va Qizil Yarimoy xalqaro harakatining ajralmas qismi bo‘lgan ushbu tashkilot o‘z jamg‘armasiga tushayotgan xayriya mablag‘larini ijtimoiy himoyaga muhtoj, kam ta’minlangan oilalar, yolg‘iz qariyalarga tibbiy-ijtimoiy yordam ko‘rsatishga yo‘naltirib kelmoqda. Jamiyat xodimlari, ko‘ngillilari hamda mehr-shafqat hamshiralari tomonidan o‘zgalar g‘amxo‘rligi va ko‘magiga muhtoj kishilar tibbiy-psixologik qo‘llab-quvvatlanmoqda. Aholining birinchi yordam ko‘rsatish ko‘nikmasiga ega bo‘lishi O‘zbekiston Qizil yarim oy jamiyati faoliyatining eng muhim yo‘nalishlaridan biridir.

Bugun, 7-aprel kuni O‘zbekiston Qizil yarim oy jamiyati Buxoro viloyat tashkilot rahbari Shahodat Ixtiyorova boshchiligidagi mas’ul xodimlar Qorovulbozor tumaniga tashrif buyurib tumandagi 19 ta ijtimoiy himoyaga muhtoj oilalarga hamda nogironligi mavjud fuqarolarga 561 200 dan jami 10 662 800 so‘m miqdoridagi insonparvarlik yordami ko‘rsatdi.