Muxsin Rajabov Buxoro viloyati sog‘liqni saqlash boshqarmasi boshlig‘i etib tayinlandi

Buxoro viloyatida navbatdagi kadrlar tayinlovi amalga oshirildi. Sog‘liqni saqlash vazirining tegishli buyrug‘i bilan Rajabov Muxsin Mansurovich Buxoro viloyati sog‘liqni saqlash boshqarmasi boshlig‘i lavozimiga tayinlandi.

Muxsin Rajabov 2002-yilda Buxoro davlat tibbiyot institutining bakalavriat bosqichini tamomlagan. Shuningdek, 2024-yilda klinik ordinatura ta’limini muvaffaqiyatli yakunlagan.

Mehnat faoliyatini Respublika shoshilinch tibbiy yordam ilmiy markazi Buxoro filialida neyroxirurg sifatida boshlagan. Keyinchalik ushbu muassasada bo‘lim mudiri, davolash ishlari bo‘yicha direktor o‘rinbosari – bosh shifokor lavozimlarida samarali faoliyat yuritgan.

Tibbiyot fanlari nomzodi bo‘lgan Muxsin Rajabov mazkur tayinlovga qadar Respublika shoshilinch tibbiy yordam ilmiy markazi Buxoro filiali direktori lavozimida ishlab kelayotgan edi.

Faoliyati davomida u o‘z kasbiy malakasini muntazam oshirib borgan. Xususan, Polsha, Rossiya va Janubiy Koreya kabi davlatlarda malaka oshirib, zamonaviy tibbiyot yo‘nalishlari bo‘yicha xalqaro tajriba orttirgan.

Sog‘liqni saqlash tizimi aholi salomatligini muhofaza qilish, sifatli va zamonaviy tibbiy xizmatlarni tashkil etishda muhim o‘rin tutadi. Shu bois tizimni samarali boshqarish, tibbiyot muassasalari faoliyatini takomillashtirish va malakali kadrlar salohiyatidan unumli foydalanish ustuvor vazifalardan biri hisoblanadi.

So‘nggi yillarda mamlakatimizda sog‘liqni saqlash sohasini modernizatsiya qilish, tibbiyot muassasalarini zamonaviy uskunalar bilan jihozlash hamda yuqori texnologik davolash usullarini keng joriy etish borasida izchil islohotlar amalga oshirilmoqda. Xorijiy tajribani o‘rganish va amaliyotga tatbiq etish esa ushbu jarayonning muhim tarkibiy qismidir.

Yangi rahbariyat oldida aholiga ko‘rsatilayotgan tibbiy xizmatlar sifatini yanada oshirish, shoshilinch va ixtisoslashtirilgan tibbiy yordamni takomillashtirish, birlamchi tibbiyot bo‘g‘ini faoliyatini mustahkamlash hamda sohada raqamli texnologiyalarni keng joriy etish kabi muhim vazifalar turibdi. Bu yo‘nalishdagi samarali ishlar aholi salomatligini mustahkamlash va tibbiyot tizimiga bo‘lgan ishonchni yanada oshirishga xizmat qilishi kutilmoqda.

Buxoroisharif.uz jamoasi Muxsin Rajabovni ushbu mas’uliyatli lavozim bilan samimiy tabriklaydi va kelgusi faoliyatida mustahkam sog‘lik, yuksak muvaffaqiyatlar hamda viloyat sog‘liqni saqlash tizimini yanada rivojlantirish yo‘lidagi ishlarida ulkan zafarlar tilaydi.