Buxorolik shifokor Maqsudjon Ergashov yuqumli kasalliklar bo‘yicha ilmiy tadqiqotini yakunladi

Buxoro tibbiyoti tizimida amaliyot va ilm-fanni uyg‘unlashtirib kelayotgan mutaxassislar safi yana bir ilmiy daraja egasi bilan kengaydi. Ergashov Maqsudjon Muzaffarovich yuqumli kasalliklar sohasida olib borgan tadqiqoti natijasida tibbiyot fanlari bo‘yicha falsafa doktori (PhD) ilmiy darajasini olish uchun dissertatsiya ishini yakunladi. Bu haqda Buxoro viloyati Sog‘liqni saqlash boshqarmasi Buxoroisharif.uz internet nashriga ma’lum qildi.

Maqsudjon Ergashov 1993-yilda Buxoro viloyatida tug‘ilgan. U 2018-yilda Toshkent tibbiyot akademiyasining “Davolash ishi” fakultetini tamomlagan.

2018–2020-yillarda Buxoro davlat tibbiyot institutida “Bolalar yuqumli kasalliklari” mutaxassisligi bo‘yicha klinik ordinaturada tahsil olgan. Hozirda Buxoro shahar tibbiyot birlashmasiga qarashli 7-oilaviy poliklinikada shifokor-infeksionist bo‘lib faoliyat yuritmoqda.

Uning ilmiy tadqiqoti “SARS-CoV-2 bilan bog‘liq pnevmoniya istiqbolini belgilashda C-reaktiv oqsil, prokalsitonin va sitokinlarning ahamiyati” mavzusiga bag‘ishlangan.

Tadqiqot 14.00.10 — “Yuqumli kasalliklar” ixtisosligi doirasida olib borilgan. Ish koronavirus infeksiyasi bilan bog‘liq pnevmoniya kechishini oldindan baholash, kasallik og‘irligini aniqlash va bemorlarni davolash taktikasini belgilash uchun ahamiyatli ekani qayd etildi.

Ilmiy izlanish natijalarini amaliyotga tatbiq etish yuqumli kasalliklarni erta aniqlash, bemor holatini to‘g‘ri baholash hamda davolash samaradorligini oshirishga xizmat qilishi kutilmoqda.