G‘ijduvonda 7,8 milliard so‘mlik sport obyektlari yangilanmoqda

G‘ijduvon tumanida umumiy qiymati 7,8 milliard so‘mlik to‘rtta sport infratuzilmasi loyihasi amalga oshirilmoqda. Bu haqda Buxoro viloyati sport boshqarmasi Buxoroisharif.uz internet nashriga ma’lum qildi.

Buxoro viloyati sport boshqarmasi boshlig‘i U. Nadjimidinov tumandagi sport obyektlarida olib borilayotgan qurilish va rekonstruksiya ishlarini ko‘zdan kechirdi.

Zarafshon mahallasidagi “Zarafshon” sport majmuasi futbol maydonida “Ochiq budjet” dasturi doirasida 1,5 milliard so‘mlik qurilish-ta’mirlash ishlari olib borilmoqda.

Pozagari mahallasida mahalliy budjet mablag‘lari hisobidan 1 milliard 400 million so‘mga zamonaviy futbol maydoni bunyod etilmoqda.

G‘alaba mahallasidagi “Paxtakor” markaziy o‘yingohida “Yangi O‘zbekiston qiyofasidagi tuman” dasturi asosida 3 milliard 400 million so‘mlik loyiha doirasida futbol maydoni rekonstruksiya qilinmoqda.

Soktari mahallasidagi “Soktari” sport majmuasida esa 1 milliard 500 million so‘m evaziga rekonstruksiya ishlari davom etmoqda.

O‘rganish davomida ishlar sifati, qurilish sur’ati va belgilangan muddatlarga rioya etilishi tekshirildi. Mas’ullarga aniqlangan kamchiliklarni bartaraf etish hamda ishlarni sifatli va o‘z vaqtida yakunlash bo‘yicha topshiriqlar berildi.

Loyihalar yakunlangach, G‘ijduvon tumanida aholi va yoshlarning sport bilan shug‘ullanishi uchun yangi imkoniyatlar yaratiladi.