Peshkuda ehtiyojmand oilalarga issiqxona qurish uchun materiallar ajratilmoqda

Peshku tumanida ehtiyojmand xonadonlarda ixcham issiqxonalar tashkil etish ishlari kengaytirilmoqda. Aholi bandligini ta’minlash va oilalarga barqaror daromad manbai yaratishga qaratilgan tashabbus doirasida zarur qurilish materiallari ajratilmoqda. Bu haqda Buxoro viloyati hokimligi Buxoroisharif.uz internet nashriga ma’lum qildi.

Viloyat hokimi Botir Zaripovning topshirig‘iga ko‘ra, har bir oilaning ijtimoiy holati, xonadon ixtiyoridagi yer maydoni, mavjud imkoniyatlari va qishloq xo‘jaligi bilan shug‘ullanishga qiziqishi alohida o‘rganildi.

Shu asosda har bir xonadon uchun eng maqbul yechim belgilanib, zarur materiallar bilan ta’minlash mexanizmi yo‘lga qo‘yildi.

Qurilish materiallari issiqxonani fuqarolarning o‘zlari qurishi sharti bilan berilmoqda. Bu yondashuv aholining tashabbuskorligini oshirish, o‘z mehnati orqali daromad topishga rag‘batlantirish va ajratilgan ko‘makdan samarali foydalanishga xizmat qilishi ko‘zda tutilgan.

Ixcham issiqxonalarda pomidor, bodring, qalampir, turli ko‘katlar va ko‘chatlar yetishtirish rejalashtirilgan. Mahsulotlarni oila ehtiyojlari uchun ishlatish bilan birga, ichki bozorda sotib, qo‘shimcha daromad olish imkoniyati ham yaratiladi.

Issiqxonalardan yil davomida samarali foydalanish, mavsumiy ekinlarni navbatlab ekish va mahsulot yetishtirish orqali xonadonlarning daromad manbasini barqarorlashtirish maqsad qilingan.

Tashabbus oilalarga bir martalik yordam berish bilan cheklanmaydi: asosiy maqsad ularni o‘z mehnati, tashabbusi va tadbirkorligi orqali barqaror daromad topishga yo‘naltirishdan iborat.