Buxoroda paxta yig‘im-terimi mavsumi rasman boshlandi

Buxoro viloyatida 2026-yil hosili uchun paxta yig‘im-terimi mavsumiga rasman start berildi. Bu yil viloyatdagi 85 ming gektar maydondan jami 450 ming tonna paxta xomashyosi yig‘ib olish rejalashtirilgan.

Mavsum boshlanishi munosabati bilan viloyat hokimi Botir Zaripov boshchiligida soha mutasaddilari, paxtachilik-g‘allachilik klasterlari rahbarlari, viloyat hokimining o‘rinbosarlari, agrosanoat majmuasiga daxldor tashkilotlar, ta’minot va xizmat ko‘rsatuvchi korxonalar mas’ullari, soha faxriylari hamda ilg‘or fermerlar Bahouddin Naqshband ziyoratgohida jam bo‘ldi.

Tadbir avvalida Qur’on tilovat qilinib, yurtda tinchlik va xotirjamlik, dasturxonlar to‘kinligi, dehqon va fermerlarning yil davomidagi mashaqqatli mehnati samarali bo‘lishi hamda yetishtirilgan hosilni nes-nobud qilmasdan yig‘ib olish tilab duo qilindi.

Qayd etilganidek, qishloq xo‘jaligida amalga oshirilayotgan islohotlar, zamonaviy agrotexnologiyalarni joriy etish, ilm-fan yutuqlaridan foydalanish, yangi navlarni sinovdan o‘tkazish hamda ishlab chiqarishga innovatsion yondashuvlarni tatbiq qilish tarmoq samaradorligini oshirishga xizmat qilmoqda.

Paxtachilikda ham e’tibor faqat ko‘proq hosil yetishtirish bilan cheklanmaydi. Dalada pishib yetilgan paxtani qisqa muddatda, sifatini yo‘qotmasdan yig‘ib olish mavsumning eng muhim bosqichlaridan biri hisoblanadi.

Joriy yilda Buxoro viloyatidagi 3 122 ta fermer xo‘jaligining 85 ming gektar maydonida 450 ming tonna paxta xomashyosi yetishtirish belgilangan. Rejaga ko‘ra, o‘rtacha hosildorlik gektariga 52,9 sentnerni tashkil etishi ko‘zda tutilgan.

Yetishtirilgan hosilni qabul qilish uchun 9 ta klaster va kooperatsiyaning 32 ta paxta qabul qilish maskani mavsumga tayyor holatga keltirilgan.

Yig‘im-terimni qisqa muddatda tashkil etish uchun katta mehnat resurslari ham shakllantirilgan. Mavsum davomida 2 040 ta otryad tarkibida 102 ming nafar terimchini jalb etish rejalashtirilgan.

Ularning 62,1 ming nafari fermer xo‘jaliklari a’zolari, 29,5 ming nafari uyushmagan aholi vakillari, yana 10,3 ming nafari esa shahar va tuman markazlaridan ixtiyoriy ravishda terimda qatnashadigan fuqarolardan iborat bo‘ladi.

Bu yil dalalarda qo‘l mehnati bilan bir qatorda texnika ulushi ham kengaymoqda. Viloyat uchun 90 ta yangi paxta terish mashinasi xarid qilingan.

Umuman olganda, mavsumga 128 ta paxta terish mashinasi jalb etiladi. Ular orasida 65 ta FM World, 36 ta John Deere, 9 ta Swan, 9 ta Boshiran hamda jami 9 ta Case va Kanza rusumli texnikalar bor.

Hosilni daladan qabul punktlariga uzluksiz yetkazib berish uchun ham alohida transport zaxirasi shakllantirilgan. Yig‘im-terimga 3 122 ta transport traktori, 3 508 ta tirkama hamda terimchilarni tashish uchun 610 ta transport vositasi safarbar qilingan.

Mavsumda terimchilar uchun zarur sharoitlarni yaratish maqsadida 204 ming dona etak, 3 122 dona tarozi, shuncha qozon-o‘choq va samovar, 4 683 dona suv saqlash baki hamda 7 016 dona tirkama yopinchiqlari zaxirasi tayyorlangan.

Paxta terish mashinalaridan samarali foydalanish va texnikalar ishini muvofiqlashtirish uchun 152 ta maxsus otryad tuzilgan. Ularga jamoat xavfsizligini ta’minlash va favqulodda holatlarning oldini olish maqsadida ichki ishlar hamda favqulodda vaziyatlar bo‘limlarining mas’ul xodimlari biriktirilgan.

Bundan tashqari, viloyatning barcha tumanlarida paxta hosilini sifatli va qisqa muddatlarda yig‘ib olish ishlarini muvofiqlashtiradigan tuman shtablari faoliyati yo‘lga qo‘yilgan.

Ayni paytda hududlarda mavsumning har bir bosqichini bir-biriga bog‘lash, texnika va transport vositalaridan unumli foydalanish, yig‘ilgan paxtani qabul qilish hamda saqlash jarayonlarini uzluksiz tashkil etishga qaratilgan ishlar olib borilmoqda.

Endilikda asosiy vazifa — bir yil davomida yetishtirilgan hosilni dalada qoldirmasdan o‘z vaqtida yig‘ib olish, paxta xomashyosining sifatini saqlash, terimchilar uchun zarur mehnat sharoitlarini yaratish va mavsumni uyushqoqlik bilan yakunlash.

Buxoro dalalarida boshlangan terim mavsumi fermer va dehqonlarning bir yillik mehnati natijasi hal bo‘ladigan muhim palladir. Endi 85 ming gektardagi hosilni 450 ming tonnalik xirmonga aylantirish mavsum ishtirokchilarining hamjihatligi, texnika imkoniyatlaridan oqilona foydalanish va ishlarning qay darajada puxta tashkil etilishiga bog‘liq.