O‘zbekistonlik ayollarning nechtasi qishloq joylarida yashaydi?

15-oktabr – Xalqaro qishloq ayollari kuni

BMT Bosh Assambleyasining 2007-yil 18-dekabrdagi “Qishloq hududlarida ayollarning ahvolini yaxshilash” to‘g‘risidagi rezolyutisiyasiga asosan, “15-oktabr – Xalqaro qishloq ayollari kuni” deb e’lon qilingan.

Birlashgan millatlar tashkiloti mazkur kunda qishloq hududlarida istiqomat qiluvchi ayollarning muammolariga e’tibor qaratishga, xususan, ularning ta’lim olishi, mehnat qilishi, farovon turmush kechirishi uchun zarur shart-sharoitlar yaratish, zo‘ravonlik va tazyiqdan himoyalash, gender tenglikni ta’minlashga chaqiradi.

2022-yilning 1-yanvar holatida, O’zbekistonda doimiy aholining 8,6 millioni qishloq joylarda istiqomat qilayotgan ayollar hisoblanadi.

Davlat statistika qo‘mitasi ma’lumotlariga ko‘ra, 2022-yilning 1-yanvar holatiga mamlakatimizda doimiy aholi soni 35,3 mln kishini tashkil etgan, shundan 8,6 millioni qishloq joylarda istiqomat qilayotgan ayollar hisoblanadi.

Aholi soni – 35,3 mln. kishi (ayollar – 17,5 mln, erkaklar – 17,8 mln);

Shaharda yashovchilar – 17,9 mln kishi (ayollar – 8,9 mln, erkaklar – 9 mln);

Qishloq joylarida yashovchilar – 17,4 mln kishi (ayollar – 8,6 mln, erkaklar – 8,8 mln).

Qishloq ayoli…

Pardozni yuzlari hech ham ko‘rmagan,
Qimmat restoranga bir bor kirmagan.
Ro‘zg‘orning tashvishidan bo‘yin burmagan,
Sabringizga ta’zim qilay qishloq ayoli!

Qo‘lida ikki chelak saharlab turgan,
O‘n chaqirim hech gapmas dalada yurgan.
Tandiru-o‘choq bilan suhbatlar qurgan,
Sabringizga ta’zim qilay qishloq ayoli!

Sochlari rang ko‘rmaydi, ro‘mol boshida,
Bir etak bolalari yurar qoshida.
Momo bo‘lib ulgurdi qirq bir yoshida
Sabringizga ta’zim qilay qishloq ayoli!

Tongda turib ketmon bilan chopadi yerni,
O‘choq yoqib qo‘lda yuvar to‘plagan kirni.
So‘rab ko‘ring hech so‘ylamas ichidagi sirni,
Sabringizga ta’zim qilay qishloq ayoli!