Kecha Qorako‘lda 2 ta yangi tibbiyot muassasasi ochildi

Yangi yil bayrami arafasida Qorako‘l tumanida bir yo‘la 2 ta zamonaviy birlamchi tibbiyot muassasalari ishga tushirildi. Bu haqida tuman hokimligi matbuot xizmati xabar qildi.

Kecha, 21-dekabr kuni bo‘lib o‘tgan ochilish marosimlarida ishtirok etgan tuman hokimi Xurshid Tohirov har ikkala mahallaning faollari, keng jamoatchilik vakillari hamrohligida muassasalarda aholi uchun yaratilgan shart-sharoitlar bilan yaqindan tanishdilar.

Shuningdek, tadbirlar davomida 10 ta oilaviy shifokorlik punktlari va 7 ta mahalla tibbiyot punktlariga Prezident sovg‘alari – zamonaviy EKG apparatlari topshirildi.

Eslatib o‘tamiz, joriy yilning o‘zida tuman aholisiga tibbiy xizmat ko‘rsatish sifati va samaradorligini oshirish maqsadida zamonaviy holga keltirilgan hamda yangidan tashkil etilgan birlamchi tibbiyot muassasalari soni mahalla tibbiyot punktlarini ham qo‘shib hisoblaganda 15 taga yetgan.